Shiroka Pula pas vrasjes në Vitomiricë: Institucionet duhet t’i mbrojnë gratë që kërkojnë ndihmë

Presidentja e Kosovës, Justina Shiroka Pula, ka kërkuar hetim të shpejtë, të plotë dhe të paanshëm për vrasjen e një gruaje në Vitomiricë të Pejës. Ajo kërkon që të shqyrtohen edhe kërkesat e viktimës dhe veprimet e institucioneve që kishin përgjegjësi për sigurinë e saj.

Në një deklaratë publike, Shiroka Pula theksoi se hetimi duhet të përfshijë rrethanat e ngjarjes dhe përgjegjësinë penale të të dyshuarve, si dhe të përcaktojë nëse u morën masat e duhura për vlerësimin e rrezikut dhe mbrojtjen e viktimës.

“Çdo sinjal rreziku, kërkesë për ndihmë apo ankesë për mosveprim institucional duhet të trajtohet me seriozitetin më të lartë”, u shpreh presidentja. Ajo nënvizoi se mbrojtja e jetës dhe sigurisë së qytetarëve është detyrim i panegociueshëm për institucionet.

Presidentja u bëri thirrje institucioneve të drejtësisë të veprojnë me urgjencë, profesionalizëm dhe paanshmëri, në mënyrë që rasti të zbardhet në të gjitha aspektet dhe përgjegjësit të dalin para drejtësisë.

Ajo kërkoi gjithashtu llogaridhënie institucionale për mbrojtjen e grave, duke thënë se çdo dyshim për mospërmbushje të detyrimeve ligjore duhet të marrë përgjigje të qartë.

“Asnjë grua nuk duhet të mbetet pa mbrojtje pasi u drejtohet institucioneve shtetërore për ndihmë. Siguria dhe dinjiteti i secilës grua duhet të jenë përgjegjësi themelore e institucioneve”, theksoi Shiroka Pula.

Në përfundim, ajo shprehu ngushëllimet më të sinqerta për familjen dhe të afërmit e viktimës. Shiroka Pula përsëriti se mbrojtja e jetës së grave është detyrim i panegociueshëm dhe se nuk mund të bëhen kompromise kur jeta e tyre është në rrezik.