Serbia ndalon Osman Selmanin në Mutivodë, transferohet në Prokurorinë për Krime Lufte në Beograd

Osman Selmani, shtetas i Kosovës, është arrestuar nga autoritetet serbe në pikën kufitare Mutivodë, në momentin kur po kthehej nga vendlindja e tij, dhe më pas është dërguar në Prokurorinë për Krime Lufte në Beograd.

Aktualisht, ai po mbahet nga autoritetet serbe nën dyshimet për krime lufte.

Familja e tij ka mohuar akuzat, duke i cilësuar si të pavërteta dhe të pabazuara, ndërsa ka shprehur bindjen se ai është i pafajshëm.

“Ne besojmë në pafajësinë e tij dhe do të qëndrojmë pranë tij deri në zbardhjen e plotë të së vërtetës,” thuhet në reagimin e familjarëve.

Në njoftimin e bërë publik prej tyre thuhet:

“Të nderuar familjarë, miq dhe kolegë,

Ju njoftojmë se babai ynë, Osman Selmani, është arrestuar më 01.07.2026 në pikën kufitare Mutivodë, teksa po kthehej nga vendlindja e tij. Aktualisht, ai ndodhet në Prokurorinë për Krime Lufte në Beograd, përballë akuzave të cilat ne, si familje, i konsiderojmë të pabazuara dhe të pavërteta.

Ne besojmë në pafajësinë e tij dhe do të qëndrojmë pranë tij deri në zbardhjen e plotë të së vërtetës. Kemi besim se drejtësia do të mbizotërojë dhe e vërteta do të dalë në pah.

Ju falënderojmë nga zemra për çdo mbështetje, lutje dhe fjalë inkurajuese në këto momente të vështira për familjen tonë.”