Rrustemi: Paralajmërimi i Kurtit për Gjykatën Speciale u vërtetua, Hoxhaj e cilëson votimin “gabim fatal” pas 11 vitesh

Deputeti i Lëvizjes Vetëvendosje, Adnan Rrustemi, ka reaguar ndaj deklaratës së deputetit të PDK-së, Enver Hoxhaj, i cili, 11 vjet pas votimit për themelimin e Gjykatës Speciale, e ka përshkruar atë vendim si një “gabim fatal”.

Në reagimin e tij, Rrustemi ka rikthyer në vëmendje kundërshtimin e hershëm të Albin Kurtit ndaj Speciales, duke theksuar se paralajmërimet e tij për pasojat e këtij procesi tashmë janë konfirmuar.

“Për Gjykatën Speciale kam shpresuar që paralajmërimi i Albinit të mos dilte i vërtetë. Fatkeqësisht, ndodhi pikërisht ajo që kishte paralajmëruar”, ka shkruar Rrustemi.

Rrustemi ka publikuar edhe reagimin e plotë të tij:

“Pothuajse çdo kritikë që Albin Kurti ka bërë në formën e një paralajmërimi gjatë 20 viteve të fundit, është dëshmuar e saktë dhe ka ndodhur ashtu siç kishte thënë. Për Gjykatën Speciale kam dashur që paralajmërimi i Albinit të rezultonte i pasaktë. Por, për fat të keq, doli ashtu siç kishte paralajmëruar. Në atë kohë, megjithatë, na thoshin: Ju jeni kundër Kosovës!

Votim i gabuar dhe fatal, siç po e cilëson sot, pas 11 vitesh, edhe Enver Hoxhaj.”