Reshitaj: Zhvillimet e mbrëmshme i dërguan botës një mesazh shumë të keq, LDK-ja ishte e gatshme të bashkëpunonte me LVV-në

Albena Reshitaj, deputete e Lidhjes Demokratike të Kosovës (LDK), bëri të ditur se Grupi Parlamentar i kësaj partie do të mblidhet sot për të shqyrtuar krizën politike në vend dhe për të diskutuar hapat që do të ndërmerren më tej.

Duke folur për zhvillimet e mbrëmshme, ajo e përshkroi situatën si të jashtëzakonshme dhe të turpshme, ndërsa vlerësoi se para gjithë botës është përcjellë një mesazh tejet i keq.

“Mbrëmë ka ndodhur një situatë e jashtëzakonshme, e turpshme dhe kemi dhënë një mesazh jashtëzakonisht të keq edhe para gjithë botës. Jam shumë e dëshpëruar me atë se si po ndërtohet e ardhmja e këtij vendi. Nuk ka aspak sinqeritet në bashkëpunime e takime. Unë kam bërë një ftesë dje që të vijnë në seancë dhe të konstituohet Kuvendi”, deklaroi Reshitaj.

Ajo theksoi gjithashtu se LDK-ja kishte shprehur gatishmëri për të punuar së bashku me Lëvizjen Vetëvendosje në procesin e formimit të institucioneve.

“Unë do të kem takim, sepse jam ftuar nga kryetari i LDK-së në Grupin Parlamentar për të diskutuar vendimet e mëtejshme. LDK-ja ka qenë e gatshme të bashkëpunojë me LVV-në për të ndërtuar institucionet”, tha ajo.