Qeveria në detyrë miraton vendime në një mbledhje virtuale

Në një mbledhje të zhvilluar online, Qeveria në detyrë e Kosovës ka marrë disa vendime.

Sipas njoftimit, është aprovuar dhënia për shfrytëzim afatgjatë dhe pa pagesë e pronave nën menaxhimin e Agjencisë Pyjore të Kosovës. Këto prona do t’i shërbejnë Kompanisë Rajonale të Ujësjellësit KRU “Mitrovica” Sh. A. për zbatimin e projektit që synon sigurimin e furnizimit me ujë të pijshëm për Komunën e Leposaviqit.

Po ashtu, Qeveria ka ndarë 255,153.45€ (dyqind e pesëdhjetë e pesë mijë e njëqind e pesëdhjetë e tre euro e dyzet e pesë cent) për tekstet shkollore në gjuhën shqipe. Këto mjete janë destinuar për nxënësit shqiptarë që ndjekin mësimin në shqip në Preshevë, Bujanoc dhe Medvegjë gjatë vitit shkollor 2025/2026.

Një vendim tjetër parasheh ndarjen e 40,000€ për përkrahjen e organizimit dhe zhvillimit të ngjarjeve me karakter ndërkombëtar në inovacion, teknologji, ndërmarrësi dhe transformim digjital. Sipas njoftimit, këto aktivitete synojnë promovimin e Republikës së Kosovës, forcimin e imazhit të saj në arenën ndërkombëtare, zhvillimin e ekosistemit vendor dhe rritjen e dukshmërisë së vendit përmes iniciativave dhe eventeve globale në këto fusha.

Nga kjo shumë, 20,000€ (njëzetë mijë euro) i ndahen FLOSSK – Free Libre Open Source Softëare Kosova, ndërsa 20,000€ (njëzetë mijë euro) janë destinuar për ICK – (Inovation Center Kosovo).