Qeveria ndan 3 milionë euro për Kartonin e Gjelbër, Gërvalla: Një vlerësim i shtetit për diasporën

Ushtruesja e detyrës së ministres së Drejtësisë, Donika Gërvalla, ka bërë të ditur se Qeveria e Kosovës ka aprovuar 3 milionë euro për të mbuluar shpenzimet e Kartonit të Gjelbër për bashkatdhetarët gjatë verës.

Sipas njoftimit, duke nisur nga muaji korrik, mërgimtarët që futen në Kosovë me automjete nuk do ta paguajnë më këtë kosto shtesë, pasi ajo do të merret përsipër nga shteti në kuadër të masës 4.5 të Pakos së Ringjalljes Ekonomike, e cila është paraparë për mbështetjen e mërgatës.

Në reagimin e saj, Gërvalla vuri në pah peshën historike që ka pasur diaspora në proceset shtetformuese të Kosovës, duke e cilësuar atë si një shtyllë të përhershme të zhvillimit të vendit.

“3 milionë euro për mbulimin e Kartonit të Gjelbër për mërgatën gjatë sezonit veror. Qeveria miratoi 3 milionë euro për mbulimin e Kartonit të Gjelbër për mërgatën gjatë sezonit veror. Nga korriku e tutje, mërgimtarët që hyjnë në Kosovë me vetura nuk do të përballen me këtë kosto shtesë, pasi ajo do mbulohet nga shteti në kuadër të zbatimit të masës 4.5, mbështetja e mërgatës nga Pakoja e Ringjalljes Ekonomike”, ka shkruar ministrja në detyrë.

Ajo ka theksuar më tej se mërgata ka qenë e pandarë nga çdo fazë e shtetndërtimit të Kosovës, që nga sakrifica për liri, te shpallja e pavarësisë, si dhe në forcimin e institucioneve dhe në zhvillimin ekonomik e shoqëror të vendit.

“Kjo masë është shprehje e respektit të jashtëzakonshëm të shtetit ndaj këtij roli historik dhe të vazhdueshëm tuajin. Është një mënyrë për t’ua lehtësuar rrugën drejt shtëpisë dhe për t’ua thënë qartë, Kosova ju pret gjithmonë si pjesë të pandashme të saj. Bashkatdhetarë, mirë se vini në shtëpinë tuaj. Kosova do t’ju mbajë gjithmonë ngrohtësisht në zemër”, ka shkruar Gërvalla.