Protestë para Gjykatës së Lipjanit në mbështetje të Bekim Metës, në pritje të vendimit

Një protestë po zhvillohet para Gjykatës së Lipjanit në mbështetje të veteranit dhe invalidit të luftës së UÇK-së, Bekim Meta. Pjesëmarrësit në tubim kanë kërkuar që rasti që po shqyrtohet nga gjykata të trajtohet në mënyrë të drejtë.

Në këtë çështje, para Gjykatës së Lipjanit aktualisht po përballen Bekim Meta dhe Skënder Shahini, teksa ende pritet vendimi i gjykatës.

Rasti ka të bëjë me një incident të ndodhur në fshatin Magurë. Sipas protestuesve, gjithçka kishte nisur pasi një familje e komunitetit rom kishte përfunduar të pamet për një familjare, kur më pas një grup personash kishte shkuar në mënyrë të organizuar te shtëpia e Skënder Shahinit, fqinjit të Bekim Metës, dhe e kishte sulmuar atë.

Sipas tyre, përplasja ishte zhvilluar para hyrjes së shtëpisë së Shahinit. Në momentin e konfliktit, Bekim Meta kishte vërejtur atë që po ndodhte dhe kishte ndërhyrë për të ndarë palët, duke i dalë në ndihmë fqinjit të tij.

Burime lidhur me rastin thonë se shkaku i konfliktit dyshohet të jetë i lidhur me një ngjarje të pasluftës. Pretendohet se Skënder Shahini kishte gjetur armë dhe municion në shtëpinë e kësaj familjeje rome dhe më pas i kishte denoncuar në polici. Sipas të njëjtave informacione, ky veprim mendohet se kishte shkaktuar pakënaqësi, ndërsa sulmi i romëve ndaj Skënderit dyshohet se kishte për motiv hakmarrjen.