Protestë e re në Prishtinë: kërkohet llogaridhënie nga institucionet dhe paralajmërohen bllokime

Protesta kombëtare kundër vrasjes së grave mbahet sot në orën 16:00, në sheshin “Zahir Pajaziti” në Prishtinë.

Organizatorët u kanë bërë thirrje qytetarëve të mblidhen përsëri për të kërkuar drejtësi për Arlinda Zekajn dhe për gratë e tjera të vrara në Kosovë.

Në një njoftim për mediat, ata paralajmëruan se protestat do të vijojnë dhe se institucionet do të bllokohen derisa të plotësohen kërkesat e tyre.

“Rikthehemi sot, në orën 16:00, në sheshin Zahir Pajaziti, për të kërkuar drejtësinë që Arlinda na e la amanet, si dhe drejtësi për çdo grua të vrarë”, thuhet në deklaratën e organizatorëve.

Organizatorët kërkojnë që institucionet të mbajnë përgjegjësi dhe u kanë kërkuar qytetarëve t’u bashkohen protestuesve.

“Edhe nesër do të dalim në rrugë dhe do t’i bllokojmë institucionet. Ka ardhur çasti i fundit që shteti të japë llogari. Bashkohuni me ne, qoftë nga puna, shtëpia apo klasa. Protestat nuk do të ndalen pa u përmbushur kërkesat tona”, thuhet në njoftim.

Po ashtu, organizatorët bëjnë thirrje për organizim dhe solidaritet në nivel kombëtar, me synim garantimin e sigurisë së grave dhe vendosjen e drejtësisë për viktimat. “Kërkojmë organizim e solidarizim kombëtar. Për siguri e liri për gratë e gjalla, e drejtësi për gratë e vrara”, thuhet në përfundim të njoftimit.

Protesta po vazhdon pas vrasjes së Arlinda Zekajt në Vitomiricë të Pejës. Ngjarja ka shkaktuar reagime publike dhe thirrje për hetimin e veprimeve të institucioneve përgjegjëse.

Para se të vritej, Zekaj i kishte paraqitur Prokurorisë Themelore në Pejë një parashtresë, ku kërkonte masa urgjente dhe shprehte shqetësim për sigurinë e saj.