Pronari i motelit të shembur në Ujman: Ndërhyrjen nuk e prisnim, gjyqi ishte caktuar për 12 gusht

Jordan Jakshiq, pronar i motelit dhe “beach bar” Lake (Jezero), të cilat autoritetet e Kosovës i rrëzuan sot në Ujman, tha se ndërhyrja e befasoi, pasi pretendon se procesi gjyqësor për pronësinë e objekteve vazhdonte ende.

Duke folur për Zubin Potok Info, ai deklaroi se familja e tij kishte ngritur padi ndaj ndërmarrjes “Ibër-Lepenci”. Sipas Jakshiqit, vetëm një ditë më herët ishin njoftuar se seanca gjyqësore ishte planifikuar për 12 gusht.

“Meqë kemi ngritur padi kundër Ibër-Lepencit, nuk mendonim se do të vinin. Dje morëm vesh se gjykimi ishte caktuar më 12 gusht. Besonim se më parë do të zhvillohej procesi gjyqësor dhe vetëm më pas do të merrej ndonjë vendim”, u shpreh ai të enjten, pasi iu shembën moteli dhe beach bari.

Në çastin kur nisi ndërhyrja, sipas Jakshiqit, brenda objektit gjendeshin dy pjesëtarë të familjes së tij, ndërsa personat që hynë aty, siç pretendoi ai, ishin “me tyta të gjata”.

“Djali dhe dhëndri im e kaluan natën këtu. Ata u futën me forcë, duke thyer derën e sallës së ngrënies dhe hyrjen kryesore. E gjetën në shtrat me armë të gjata. Mendonim se kjo nuk do të ndodhte. Kemi jetuar këtu për më shumë se 30 vjet”, tha Jakshiq.

Objekti ishte i 17-ti që u rrëzua gjatë këtij muaji nga inspektorati i Ministrisë së Mjedisit dhe Planifikimit Hapësinor. Veprimet pasuan kërkesën e kompanisë “Ibër-Lepenc”, e cila deklaroi se të gjitha objektet ishin ngritur në pronën e kësaj ndërmarrjeje publike, në zonën e liqenit të Ujmanit. Kompania tha gjithashtu se pronarët e deriatëhershëm nuk kishin pranuar t’i lironin, megjithëse kjo u ishte kërkuar në fillim të muajit.

Shembja e së enjtes u realizua edhe pse Bashkimi Evropian u kishte bërë së fundmi thirrje autoriteteve të Kosovës që të ndalonin çdo veprim deri në mbylljen e procedurave gjyqësore për çështjen e pronësisë së objekteve përreth Ujmanit.