Prokuroria Speciale dorëzon aktakuzën për vrasjen e familjes Jashari në Prekaz, Isufaj zbardh detajet

Prokuroria Speciale e Republikës së Kosovës ka bërë të ditur, gjatë një konference për media, se ka dorëzuar aktakuzë për krimet e luftës të kryera në lagjen e Jasharajve, në Prekaz të Skenderajt.

Kryeprokurori Blerim Isufaj e vlerësoi këtë zhvillim si një moment të rëndësishëm për drejtësinë dhe opinionin publik. Ai nënvizoi se bëhet fjalë për aktakuzën e parë që lidhet me vrasjen e civilëve shqiptarë të familjes Jashari në Prekaz.

Isufaj deklaroi se aktakuza është hartuar pas një pune profesionale, të kujdesshme dhe të mbështetur në prova, në përputhje me mandatin dhe përgjegjësitë ligjore të Prokurorisë Speciale. Sipas tij, dokumenti lidhet me vrasjen e civilëve të familjes Jashari në Prekaz të Skenderajt dhe përbën aktakuzën e parë për këtë ngjarje, raporton eo.

Tashmë, shqyrtimi i aktakuzës dhe i provave i takon gjykatës, e cila duhet t’i vlerësojë ato në përputhje me ligjin dhe standardet e gjykimit të drejtë. Kryeprokurori tha se prokurorët e çështjes kanë punuar me kujdes të shtuar, me synimin që pretendimet e paraqitura të dëshmohen para gjykatës.

Sipas Isufajt, kjo aktakuzë tregon se institucionet vazhdojnë të kërkojnë përgjegjësi penale për krimet e luftës, pavarësisht ndërlikueshmërisë së rasteve dhe kohës së gjatë që ka kaluar nga kryerja e tyre.

Gjatë konferencës, kreu i Prokurorisë Speciale foli edhe për hetime të tjera ende aktive, mes tyre rastin e krimeve të luftës në Zubin Potok. Ai bëri të ditur se në këtë çështje është arrestuar edhe i dyshuari i katërt, por sqaroi se nuk mund të japë detaje për shkak se hetimi vijon.

Isufaj theksoi se i njëjti qëndrim zbatohet për çdo rast tjetër që ndodhet në fazën e hetimeve. Ai tha se Prokuroria Speciale mbetet e angazhuar për sundimin e ligjit, zhvillimin e hetimeve në mënyrë profesionale, të pavarur dhe të paanshme, si dhe për ndjekjen penale të personave ndaj të cilëve ekziston bazë ligjore dhe prova të mjaftueshme.

Ai njoftoi gjithashtu se gjatë javëve të fundit është dorëzuar një aktakuzë e rëndësishme për spiunazh dhe është arrestuar një person i dyshuar për një vepër penale të kësaj natyre.

Isufaj vlerësoi edhe bashkëpunimin me partnerët ndërkombëtarë në fushën e sigurisë dhe drejtësisë. Ai përmendi Shtetet e Bashkuara të Amerikës, Mbretërinë e Bashkuar, Europolin, Eurojust-in dhe autoritetet e tjera të drejtësisë, duke theksuar se ky bashkëpunim e dëshmon Prokurorinë Speciale të Republikës së Kosovës si partner të qëndrueshëm dhe të besueshëm.