Prokuroria në Gjilan jep detaje për vrasjen e rëndë në Livoç të Poshtëm

Pas vrasjes së rëndë të ndodhur në fshatin Livoç i Poshtëm të Komunës së Gjilanit, Departamenti për Krime të Rënda i Prokurorisë Themelore në Gjilan ka publikuar një njoftim për media me të dhëna rreth rastit dhe veprimeve hetimore.

Sipas këtij njoftimi, më 09.10.2026, rreth orës 14:30, Policia e Kosovës-NJHP në Gjilan e ka informuar Prokurorin e Shtetit për ngjarjen. Dyshimet janë se i pandehuri V.R. (38 vjeç), nga Gjilani, ka vrarë me armë zjarri bashkëshorten e tij, N.B (27 vjeç), dhe vëllain e saj, E.B (31 vjeç). Motivet mbeten ende të panjohura.

Në të njëjtin rast është plagosur rëndë edhe M.B (48 vjeç), djali i xhaxhait të bashkëshortes së të pandehurit. Për shkak të plagëve të marra, ai po merr trajtim në QKUK.

Prokurori i Shtetit dhe të gjitha ekipet përkatëse policore kanë shkuar në vendngjarje, ku kanë kryer veprimet e nevojshme për zbardhjen e rastit, bën të ditur Prokuroria.

Gjatë këtyre veprimeve janë sekuestruar prova materiale dhe një pistoletë “Bereta”, leja e së cilës kishte skaduar. Dyshohet se kjo armë është përdorur për kryerjen e veprës penale. Prova të tjera materiale janë sekuestruar edhe pas kontrolleve në tri lokacione të pronave të të pandehurit.

Në njoftim sqarohet gjithashtu se i pandehuri nuk ka të kaluar kriminale dhe se nuk ka pasur asnjë rast të raportuar për dhunë në familje.

Prokuroria Themelore në Gjilan thekson se, në bashkërendim me Policinë e Republikës së Kosovës, ka ndërmarrë veprime hetimore dhe do t’i vijojë ato për të sqaruar plotësisht dhe drejt gjendjen faktike.