Për vrasjen e imamit në Zlipotok, Prokuroria kërkon paraburgim për dy të dyshuarit

Prokuroria Themelore në Prizren i ka propozuar Gjykatës Themelore në këtë komunë caktimin e masës së paraburgimit për dy persona të dyshuar, B.H. dhe I.H., në lidhje me rastin e vrasjes së rëndë të ndodhur të hënën në mbrëmje në fshatin Zlipotok të Komunës së Dragashit, ku humbi jetën imami Gazmend Tahirovci.

Në kërkesën e Prokurorisë thuhet se B.H. dyshohet se më 29 qershor 2026, rreth orës 23, pas një konflikti të mëhershëm me viktimën G.T. lidhur me shfrytëzimin e një prone, përkatësisht një livadhi, e ka sulmuar me një mjet të mprehtë, thikë, duke i shkaktuar plagë vdekjeprurëse. Sipas të dhënave, viktima ka ndërruar jetë në vendin e ngjarjes.

Përmes një kumtese për media, Prokuroria ka bërë të ditur se ndaj B.H. ekziston dyshimi për kryerjen e veprës penale “Vrasja e rëndë”, sipas nenit 173 të Kodit Penal të Republikës së Kosovës.

Ndërkohë, I.H., që është babai i të dyshuarit kryesor, dyshohet se nuk i ka ofruar ndihmë viktimës, edhe pse ka qenë pranë vendit të ngjarjes dhe ka pasur mundësi të vepronte pa vënë në rrezik veten apo persona të tjerë. Ai po dyshohet për veprën penale “Mosdhënia e ndihmës”, sipas nenit 188 të Kodit Penal.

Prokuroria Themelore në Prizren ka theksuar se do të vazhdojë të jetë e angazhuar në luftën kundër kriminalitetit, në forcimin e sundimit të ligjit dhe në nxjerrjen para drejtësisë të të gjithë atyre që bien ndesh me ligjin.