Pas zgjedhjeve në Serbi, Kuçi: Humbja e Vuçiqit mund të shënojë fundin e destabilizimit

Presidenti serb, Aleksandar Vuçiq, ka pranuar humbjen në zgjedhje, një zhvillim që ka rikthyer vëmendjen te e ardhmja politike e Serbisë dhe ndikimi i mundshëm i saj në raportet me Kosovën.

Gurakuç Kuçi e ka cilësuar këtë rezultat si një mundësi që Serbia të largohet nga politikat destabilizuese. Megjithatë, ai ka theksuar se ndryshimi politik nuk përbën vetvetiu garanci për përmirësimin e marrëdhënieve me Kosovën, pasi këtë do ta dëshmojnë vetëm veprimet konkrete të udhëheqjes së ardhshme serbe, transmeton “Bota sot”.

Pas më shumë se një dekade dominimi politik, Aleksandar Vuçiqi ka pranuar humbjen përballë lëvizjes studentore. Ky zhvillim paraqet rëndësi jo vetëm për Serbinë, por edhe për sigurinë në Ballkanin Perëndimor.

Qasja e studentëve ndaj Kosovës nuk ndryshon në thelb nga qëndrimi tradicional serb për pavarësinë e saj. Sidoqoftë, kjo çështje duhet parë edhe në kuadër të zgjedhjeve, pasi shmangia e temave të ndjeshme të politikës së jashtme mund të ketë qenë një strategji për t’i bashkuar qytetarët rreth luftës kundër korrupsionit, autoritarizmit dhe kapjes së institucioneve.

Për këtë arsye, lëvizja studentore nuk duhet të barazohet menjëherë me regjimin e Vuçiqit. Në të njëjtën kohë, nuk duhet të supozohet se ndryshimi i pushtetit do të sjellë automatikisht një kurs të ri të Serbisë ndaj Kosovës.

Regjimi i Vuçiqit ka përdorur nacionalizmin, tensionet me Kosovën dhe retorikën kërcënuese si mjete për ruajtjen e pushtetit politik. Humbja e tij mund t’i hapë rrugë një qasjeje tjetër, që nuk do të mbështetet në konflikt dhe destabilizim.

Megjithatë, shenja e vërtetë e ndryshimit nuk do të jetë vetëm demokratizimi i brendshëm i Serbisë. Ajo do të matet edhe përmes sjelljes së vendit ndaj shteteve fqinje.

Për Kosovën, zhvillimet politike në Beograd duhet të vlerësohen në bazë të veprimeve konkrete dhe jo të deklaratave elektorale.

Rënia e Vuçiqit mund të jetë hapi i parë drejt fundit të një modeli destabilizues, por vetëm politika e ardhshme do të tregojë nëse ai model ka marrë fund.