Pacolli publikon arsyetimin e Gjykatës së Lartë pro MABCO-s për Aeroportin e Vlorës dhe kërkon sërish nisjen e hetimeve nga SPAK

Behgjet Pacolli ka reaguar pas vendimit të Gjykatës së Lartë në Shqipëri për çështjen e Aeroportit të Vlorës, vendim që i dha të drejtë kompanisë MABCO.

Sipas këtij vendimi, MABCO pritet të rikthehet në kantierin e Aeroportit të Vlorës për të vazhduar punimet bashkë me nënkontraktorët e saj. Me vendimin e shkallës më të lartë të gjyqësorit, kompanisë i rikthehen të drejtat e administrimit në shoqërinë koncesionare, ndërsa rrëzohen vendimet e mëhershme të dy shkallëve të gjykimit.

Pacolli bëri publike konkluzionet e gjykatës lidhur me këtë çështje, duke deklaruar se një projekt strategjik kombëtar ishte mbajtur peng.

Njëkohësisht, ai përsëriti thirrjen që SPAK të nisë hetime.

“Andaj edhe njëherë FTOJMË SPAK-un të vazhdojë HETIMIN e thellë që të identifikohen të gjitha veprimet dhe mosveprimet e secilit person përgjegjës, e në veçanti të atyre që e orkestruan, e urdhëruan dhe e ekzekutuan këtë skandal të rëndë, i cili dëmtoi rëndë imazhin dhe dinjitetin e familjes sime, cenoi të drejtën tonë kushtetuese për t’u mbrojtur nga veprimet e paligjshme, kufizoi lirinë tonë të lëvizjes, na mohoi të drejtën për të punuar dhe cenoi të drejtën tonë të pronës dhe ushtrimin e ligjshëm të saj”.