Pacolli për arrestimet në Zubin Potok: Përgjegjësit do të përballen me drejtësinë, pa kufizim kohe

Ministrja e Mjedisit, Fitore Pacolli, komentoi ndalimin e nëntë personave në Zubin Potok, të cilët dyshohen për krime lufte ndaj civilëve gjatë luftës në Kosovë.

Sipas saj, koha e kaluar nuk e kufizon kërkimin e drejtësisë për viktimat dhe familjarët e tyre, ndërsa të dyshuarit duhet të japin llogari para ligjit.

Pacolli tha se, gjatë qeverisjes së Kurtit, institucionet e Kosovës e kanë shtrirë autoritetin në veri. Ajo nënvizoi se policia vepron dhe se krimi po luftohet.

Në postimin e saj, Pacolli shkroi se lajmi për arrestimin e nëntë personave të dyshuar për krime lufte ndaj popullatës civile ishte lajm i mirë. Ajo theksoi se krimet nuk harrohen dhe se përgjegjësit duhet të përballen me ligjin, kudo që ndodhen dhe pavarësisht sa kohë ka kaluar.

Sipas saj, vetëm pas ardhjes së Vetëvendosjes në pushtet shteti i Kosovës arriti të vendosë zbatimin e ligjit edhe në zona ku, për vite, kriminelët besonin se nuk mund të prekeheshin.

Pacolli tha se veriu ishte trajtuar për një kohë të gjatë si zonë ku ligji i Republikës së Kosovës nuk zbatohej. Ajo pretendoi se kriminelët vepronin, institucionet heshtnin dhe qeveritë e mëparshme toleronin një gjendje që dëmtonte shtetin.

“Me Qeverinë Kurti kjo ndryshoi”, deklaroi ajo, duke shtuar se institucionet e Kosovës tashmë kanë autoritet në veri, policia vepron dhe personat që mendonin se mund t’i shpëtonin drejtësisë po përballen me ligjin.

Postimin e saj, Pacolli e përmbylli me mesazhin: “Sovranitet, rend dhe ligj. Në çdo cep të Republikës së Kosovës.”