Osmani: Jashari dhe Rugova i përkasin një historie të përbashkët që askush s’mund ta përvetësojë

Vjosa Osmani, deputete e Lidhjes Demokratike të Kosovës (LDK) dhe ish-presidente e Kosovës, ka reaguar ndaj diskutimeve për ligjin për mbrojtjen e vlerave të luftës së UÇK-së. Sipas saj, Ushtria Çlirimtare e Kosovës përfaqëson krenari kombëtare dhe nuk mund të shndërrohet në mjet për linçim politik.

Në reagimin e saj, Osmani ka kundërshtuar atë që e konsideron përpjekje për të monopolizuar historinë e luftës çlirimtare. Ajo është shprehur se kësaj lufte i takon nderim i përhershëm, pasi UÇK-ja mishëronte betimin e përgjakur të një populli që sakrifikoi gjithçka në emër të lirisë.

Duke iu referuar figurave historike të Kosovës, ajo ka veçuar komandantin e UÇK-së, Adem Jasharin, dhe ish-presidentin Ibrahim Rugova. Osmani e ka përshkruar si krenarinë më të madhe historinë që bashkon Jasharin, si Komandant të UÇK-së, me Rugovën, si Komandant Suprem të luftës çlirimtare, duke theksuar se të dy i shërbyen idealit të lirisë së Kosovës, secili përmes rrugës së tij.

Për Osmanin, nderimi dhe mbrojtja e luftës për çlirim nuk janë e njëjta gjë me përpjekjet për ta bërë atë pronë politike. Ajo ka nënvizuar se kjo histori është e përbashkët dhe e shenjtë, ndaj askujt nuk i takon e drejta për ta përvetësuar.

Në lidhje me përplasjet politike, Osmani ka thënë se as duartrokitjet e turmës dhe as ashpërsia e sulmeve nuk përcaktojnë nëse një qëndrim politik është i drejtë. Ajo ka pretenduar gjithashtu se kthimi i ligjit e la propagandën pa argumente.

Sipas saj, për të fshehur të vërtetën është përdorur linçimi politik kundër LDK-së. Osmani e ka cilësuar këtë forcë politike si partinë që hodhi themelet e lirisë, të pavarësisë dhe të demokracisë në Kosovë.

Ajo ka hedhur poshtë edhe barazimin e LDK-së me Listën Serbe, si dhe pretendimet se partia e saj ushqen urrejtje ndaj UÇK-së. Në këtë kontekst, Osmani ka deklaruar se partia e Ibrahim Rugovës është vënë në të njëjtin rrafsh me Listën Serbe, të cilën ajo e ka përshkruar si grup kriminal që kreu agresion ndaj Kosovës, ndërsa ndaj LDK-së është ngritur edhe akuza se e urren UÇK-në.