Osmani kundërshton rrëzimin e vetos: LDK-ja nuk përkrah nisma që nuk mbrojnë të vërtetën historike të Kosovës

Deputetja e Lidhjes Demokratike të Kosovës (LDK) dhe ish-presidentja e Kosovës, Vjosa Osmani, tha se partia e saj nuk do ta mbështesë përmbysjen e vetos së presidentes nëse kjo bëhet për të rikthyer në kuvend dhe për të miratuar të njëjtin ligj, raporton Ekonomia Online.

Sipas Osmanit, LDK-ja po pret të shohë çfarë do të paraqitet në kuvend, pasi qëndrimi i saj varet edhe nga përmbajtja. Megjithatë, ajo tha se partia, në parim, është kundër miratimit të ligjit të pandryshuar përmes rrëzimit të vetos. Përveç arsyeve të paraqitura në seancën e mëparshme, Osmani tha se LDK-ja ka edhe argumente të tjera, të cilat do t’i paraqesë në seancën e sotme nëse i jepet mundësia.

Ajo sqaroi se ende nuk është e qartë nëse bëhet fjalë për përmbysjen e vetos së presidentes apo për një nismë të re që synon ndryshimin e ligjit. Sidoqoftë, Osmani theksoi se LDK-ja nuk përkrah iniciativa që, sipas saj, nuk sjellin mbrojtje reale për të vërtetën historike të Republikës së Kosovës dhe luftën e saj çlirimtare, por krijojnë pritje të rreme.

Osmani vlerësoi se institucionet duhej ta kishin përqendruar energjinë te mbrojtja e kësaj të vërtete, veçanërisht në arenën ndërkombëtare. Ajo tha se, ndonëse kanë kaluar gati dy muaj nga vendimi, nuk ka pasur asnjë intervistë në media të rëndësishme ndërkombëtare për ta mbrojtur para botës të vërtetën historike të Kosovës.

Sipas saj, mungon edhe një prezantim i koordinuar shtetëror në platformat e rëndësishme ndërkombëtare. Osmani përmendi se ajo vetë ka folur për këtë çështje në The New York Times dhe në platforma të tjera të rëndësishme ndërkombëtare nga 16 shtatori e tutje. Ajo i cilësoi nismat e ndërmarra ndërkohë si të papajtueshme me Kushtetutën dhe me obligimet ndërkombëtare të Kosovës.

Osmani paralajmëroi se, sipas vlerësimit të saj, këto iniciativa mund ta dëmtojnë më tej mbrojtjen e së vërtetës historike, sidomos para procedurës së apelit. Ajo tha se mund t’i dëmtojnë edhe vetë krerët e UÇK-së, mbrojtja e të cilëve në apel, sipas saj, duhet të mbështetet në argumente të fuqishme juridike.

Duke iu përgjigjur kritikave ndaj LDK-së, Osmani tha se partia i ka shprehur qëndrimet e saj mbi parime, por për këtë është sulmuar dhe njollosur në mënyrë të papranueshme. Ajo përmendi si shembull vendosjen e emrave të përfaqësuesve të LDK-së pranë njerëzve të Serbisë, të cilën e quajti etiketim të papranueshëm.

Ajo ritheksoi se LDK-ja do të vazhdojë të mbrojë të vërtetën historike të Kosovës dhe luftën e drejtë të Ushtrisë Çlirimtare të Kosovës. Në të njëjtën kohë, tha Osmani, partia do të mbrojë pa i kërkuar leje askujt dinjitetin e njerëzve të saj dhe të familjeve të veprimtarëve të LDK-së, të cilët në të kaluarën janë vrarë, torturuar dhe etiketuar si bashkëpunëtorë sepse i kanë qëndruar besnikë presidentit historik.

Sipas Osmanit, mbrojtja e së vërtetës së UÇK-së dhe mbrojtja e dinjitetit të veprimtarëve të LDK-së nuk bien ndesh me njëra-tjetrën, por plotësohen. Për ta ilustruar këtë qëndrim, ajo përmendi binomin e presidentit Ibrahim Rugova dhe komandantit, kryekomandantit të UÇK-së, Adem Jashari.