Nga Haga, Tërnava dhe Gjergji shprehin përkrahje për ish-krerët e UÇK-së

Kryeimami i Kosovës, Naim Tërnava, dhe Ipeshkvi Imzot Dodë Gjergji kanë përcjellë nga Haga një mesazh mbështetjeje për Hashim Thaçin, Kadri Veselin, Jakup Krasniqin dhe Rexhep Selimin.

Platforma qytetare “Liria Ka Emër” njoftoi se dy udhëheqësit fetarë kanë shprehur qëndrimin e tyre në lidhje me ish-drejtuesit e UÇK-së, të cilët po përballen me proces gjyqësor në Hagë.

Sipas platformës, Tërnava dhe Gjergji kanë qenë pranë përfaqësuesve të saj edhe gjatë ditëve të fundit, duke mbështetur atë që “Liria Ka Emër” e përshkruan si të vërtetën historike dhe luftën çlirimtare.

Platforma ka bërë të ditur se gjykimi në Hagë po i afrohet përfundimit dhe ka kërkuar që zëri i Kosovës të përcillet fuqishëm.

Ndërkohë, “Liria Ka Emër” ka rikujtuar qytetarët për “Marshin për Liri”, i cili do të mbahet më 12 shtator në Prishtinë. Aktiviteti nis në orën 14:00 nga sheshi “Skënderbeu” dhe organizohet në mbështetje të ish-krerëve të UÇK-së, si dhe të kërkesës për drejtësi.