Nata e 15-të e protestave në Prishtinë, qytetarët vendosin mesazhin “Bac s’u kry

Sheshi “Skënderbeu” në Prishtinë është mbushur sërish me qytetarë, të cilët janë mbledhur në natën e pesëmbëdhjetë të protestave kundër aktgjykimit dënues të Dhomave të Specializuara ndaj ish-krerëve të UÇK-së.

Gjatë tubimit, protestuesit vendosën mbishkrimin “Bac s’u kry”, si shenjë përkrahjeje për Hashim Thaçin, Jakup Krasniqin, Kadri Veselin dhe Rexhep Selimin, të dënuar më 16 shtator nga Dhomat e Specializuara në Hagë me gjithsej 81 vjet heqje lirie.

Pjesëmarrësit përsëritën kërkesën për lirimin e ish-krerëve të UÇK-së, ndërsa deklaruan se vendimi i Gjykatës Speciale “nuk është në emrin e tyre”.

Një thirrje iu drejtua edhe Qeverisë së Kosovës, nga e cila u kërkua që para datës 6 tetor të procedojë me urgjencë në Kuvend projektligjin për ndryshimin dhe plotësimin e Ligjit për Dhomat e Specializuara.

Ndërkohë, platforma Liria ka Emër ka paralajmëruar një tjetër protestë për nesër në sheshin “Skënderbeu”, duke nisur nga ora 16:00. Tubimi do të mbahet në shenjë revolte ndaj vendimit të Gjykatës Speciale dhe në mbështetje të ish-krerëve të UÇK-së.

Protesta kundër vendimit të Speciales janë zhvilluar edhe jashtë Kosovës, në Shkup, në disa qytete të SHBA-së, si dhe në Kanada, Zvicër, Gjermani e Austri. Protesta të reja janë paralajmëruar edhe në Bruksel më 10 tetor.