Musliu kritikon BE-në për qasjen ndaj Kosovës dhe Serbisë: Po hesht për Beogradin dhe krimet e luftës

Situata në veri të Kosovës është rikthyer në vëmendje pas një sërë zhvillimesh që lidhen me prokurorët serbë, reagimet e Bashkimit Evropian, rrënimin e ndërtimeve pa leje në zonën e Ujmanit dhe zbulimin e një varreze masive në Kalludër të Zubin Potokut. Këto çështje kanë nxitur diskutime për sigurinë, drejtësinë dhe marrëdhëniet mes Kosovës e Serbisë.

Për këto tema ka folur për “Bota sot” juristi nga Belgjika, Skënder Musliu. Sipas tij, Kosova vazhdon të përballet me trysni politike, ndërsa Serbia nuk ka hequr dorë nga politikat që, në vlerësimin e tij, synojnë destabilizimin e vendit.

Musliu e akuzon Bashkimin Evropian për standarde të dyfishta, pasi, siç shprehet, Brukseli i kushton më shumë vëmendje veprimeve të institucioneve të Kosovës sesa deklaratave dhe politikave të Beogradit.

Ai rikujtoi se marrëveshjet e vitit 2013, të arritura në kuadër të dialogut Kosovë-Serbi me ndërmjetësimin e Bashkimit Evropian, e obliguan Kosovën që komunitetin serb ta përfshinte në institucionet shtetërore.

“Në kuadër të këtyre marrëveshjeve, u punësuan disa qindra policë dhe punonjës të pushtetit lokal, si dhe rreth 130 gjyqtarë, prokurorë e punonjës administrativë të sistemit të drejtësisë në katër komunat e veriut të Kosovës”, deklaroi Musliu.

Sipas tij, largimi i zyrtarëve serbë nga institucionet nuk u shkaktua vetëm nga mosmarrëveshjet për targat e automjeteve. Ai e konsideron atë një veprim të organizuar, ku çështja e targave shërbeu vetëm si arsye e dukshme.

“Dorëheqja e kryetarëve të katër komunave me shumicë serbe në veri, e zyrtarëve policorë, gjyqtarëve dhe prokurorëve serbë, nuk erdhi vetëm për shkak të targave. Shkaku kryesor ishin presionet, shantazhet dhe frikësimet nga Radoiçiqi dhe regjimi i Beogradit, me synim destabilizimin, cenimin e sigurisë dhe dëmtimin e sovranitetit të Kosovës”, u shpreh ai.

Musliu tha se kërkesat e disa gjyqtarëve dhe prokurorëve për t’i tërhequr dorëheqjet nuk mund të trajtohen jashtë kornizës ligjore. Ai theksoi se drejtësia duhet të funksionojë në mënyrë të pavarur dhe të mos ndikohet nga presionet politike.

Në këtë kontekst, ai i cilësoi disa reagime ndërkombëtare si të njëanshme, ndërsa e veçoi Ambasadën e Shteteve të Bashkuara në Prishtinë për një qëndrim më të matur.

“Ndryshe nga reagimet e tjera ndërkombëtare, Ambasada e SHBA-së në Prishtinë u tregua më e kujdesshme dhe konstruktive. Ajo rikujtoi se Kushtetuta e Kosovës garanton përfaqësimin e komunitetit serb në institucione dhe se Qeveria e Kosovës do t’i sigurojë këto të drejta”, tha Musliu.

Juristi nga Belgjika i konsideroi kritikat e BE-së ndaj vendimeve të institucioneve të Kosovës si ndërhyrje në sistemin e drejtësisë.

“Me deklaratat dhe veprimet e saj, BE-ja po ndërhyn në mënyrë brutale dhe të papërgjegjshme në një sistem të pavarur, i cili është i ndarë nga pushteti. Për fat të keq, ajo ende nuk e ka kuptuar realitetin e Kosovës dhe vazhdon të sillet sikur vendi të ishte nën mbikëqyrjen e faktorit ndërkombëtar”, deklaroi ai.

Musliu u shpreh kritik edhe për raportin e Brukselit me Serbinë. Ai tha se, pavarësisht politikave që i cilësoi si destruktive dhe pretendimeve hegjemoniste të Beogradit ndaj Kosovës e vendeve të tjera të rajonit, BE-ja vazhdon ta paraqesë regjimin e Vuçiqit si palë konstruktive në dialog.

“Serbia prej dekadash ndjek politika destruktive ndaj Kosovës, ndërsa ka shfaqur pretendime hegjemoniste edhe ndaj shteteve të tjera të rajonit. Megjithatë, BE-ja vazhdon ta përgëzojë regjimin e Vuçiqit si faktor të dialogut konstruktiv”, theksoi ai.

Sipas Musliut, deklaratat e zyrtarëve serbë dëshmojnë se Beogradi nuk është shkëputur nga narrativat e vjetra. Ai përmendi qëndrimet se Kosova është pjesë e pandashme e Serbisë dhe deklaratat që, sipas tij, justifikojnë politikat e viteve të kaluara.

“Këto deklarata tregojnë se Beogradi vazhdon të mbështetet në narrativa destabilizuese”, u shpreh Musliu.

Duke folur për rrënimin e objekteve pa leje në Zubin Potok, pranë liqenit të Ujmanit, ai tha se institucionet kosovare kanë vepruar brenda ligjit.

“Objektet ishin ngritur pa leje ndërtimi në pronën e ndërmarrjes ‘Ibër-Lepenc’ dhe përbënin uzurpim të pronës në një zonë të mbrojtur. Rrënimi u bë vetëm pasi u përfunduan procedurat ligjore. Edhe në këtë rast, BE-ja e kritikoi Qeverinë e Kosovës dhe u dha hapësirë argumenteve të Serbisë”, deklaroi ai.

Musliu komentoi gjithashtu zbulimin e varrezës masive në Kalludër të Zubin Potokut, ku dyshohet se gjenden trupat e 23 shqiptarëve të zhdukur gjatë luftës.

“Serbia vazhdon t’i mohojë krimet e luftës. BE-ja nuk ka pasur asnjëherë guximin ta ndëshkojë Beogradin dhe t’i vendosë sanksione serioze për politikat e tij destruktive. Përkundrazi, ajo përsërit vazhdimisht se Serbia është e përkushtuar ndaj dialogut konstruktiv”, tha ai.

Ai kritikoi edhe një pjesë të mediave dhe të subjekteve politike në Kosovë, të cilat, sipas tij, po krijojnë rrëfime që dëmtojnë interesat e vendit.

“Për fat të keq, disa media dhe OJQ janë rreshtuar në të njëjtën linjë me politikat destruktive të Beogradit. Këto narrativa krijojnë një pamje të rreme për Kosovën dhe u shërbejnë vetëm kundërshtarëve të saj”, deklaroi Musliu.

Edhe opozitën kosovare ai e akuzoi se po ndjek një qasje që dobëson institucionet e vendit.

“Veprimet dhe deklaratat e papërgjegjshme të disa politikanëve opozitarë, mediave dhe OJQ-ve krijojnë narrativa të gabuara kundër Kosovës. Ato ndikojnë edhe në perceptimin e ndërkombëtarëve, të cilët më pas i drejtojnë kritikat ndaj institucioneve kosovare”, u shpreh ai.

Në përmbyllje, Musliu tha se politikat e Qeverisë Kurti për shtrirjen e sovranitetit në veri kanë qenë të drejta. Ai kërkoi mbështetje për institucionet e Kosovës në përpjekjet për ndërtimin e shtetit ligjor.

“Politikat dhe veprimet e institucioneve të Kosovës kanë synuar forcimin e sovranitetit, ndërtimin e shtetit ligjor dhe mbrojtjen e rendit kushtetues. Për këtë arsye, institucionet që mbrojnë këto parime duhet të kenë përkrahje të parezervë”, përfundoi Skënder Musliu për “Bota sot”.