Musliu kërkon që ndryshimi i Ligjit për Specialen të shqyrtohet në të gjitha komisionet deri në orën 12:00

Deputetja e PDK-së, Ganimete Musliu, i ka bërë thirrje Kuvendit të Kosovës që të përshpejtojë procedurat për shqyrtimin e projektligjit, duke caktuar orën 12:00 si afat për përmbylljen e hapave të parë.

Sipas saj, deri në këtë orë, projektligji duhet të kalojë në të gjitha komisionet përkatëse dhe të hidhet për shqyrtim në lexim të parë.

“Tani duhet të fillojë numërimi mbrapsht për Kuvendin. Më së largu deri në orën 12:00, Kuvendi duhet ta trajtojë Ligjin në të gjitha komisionet përkatëse dhe ta kalojë në lexim të parë.”

Musliu ka kërkuar që procedura të mos shtyhet më tej, duke vlerësuar se nuk ka më vend për justifikime apo përllogaritje politike.

“Deri në orën 12:00 duhet të dihet nëse Kuvendi do ta kryejë përgjegjësinë e tij apo do ta mbajë peng këtë proces. Ora po ecën. Tash është radha e Kuvendit të veprojë”, ka deklaruar Musliu.