Murati: PDK-ja mungoi në seancën konstituive, LVV-ja pranoi të mbështeste kandidatët e saj

Pas përfundimit të procesit të konstituimit të Kuvendit të Kosovës, ministri në detyrë i Financave, Hekuran Murati, tha se procedura përfundoi pa zgjedhjen e njërit prej nënkryetarëve, pasi PDK-ja nuk paraqiti kandidat dhe nuk mori pjesë në seancë.

Sipas Muratit, Partia Demokratike e Kosovës kishte kërkuar për javë me radhë që Kuvendi të konstituohej, por në ditën kur u krijuan kushtet për zhvillimin e procesit zgjodhi ta bojkotojë atë.

“Seanca e sotme e Kuvendit po mbyllet me sukses. Çështja kryesore nuk ishte vetë konstituimi i Kuvendit, por zgjedhja e presidentit, e cila në mandatin e kaluar e çoi vendin drejt zgjedhjeve. Për ta zgjidhur këtë problem, ne kemi vlerësuar se duhej të kishte një marrëveshje përpara konstituimit”, deklaroi Murati.

Ai e cilësoi si të papërgjegjshme mungesën e grupit parlamentar të PDK-së në sallë.

“Kuvendi u konstituua, por mbeti pa një nënkryetar, sepse grupi parlamentar i PDK-së nuk pranoi të propozonte kandidatin ose kandidaten e vet. Është për keqardhje që ky grup, pasi për shumë javë protestoi para qeverisë dhe kërkoi vazhdimisht konstituimin e Kuvendit, në ditën kur kjo u bë e mundur vendosi të mos e përmbushte përgjegjësinë e tij dhe të bojkotojë seancën konstituive”, u shpreh ai.

Murati tha se Lëvizja Vetëvendosje ishte e gatshme të votonte kandidatët e opozitës për nënkryetarë, me synimin që të kapërcehej bllokada institucionale.

“Për të zhbllokuar situatën dhe për të vazhduar përpara, ne pranuam të votonim kandidatët e tyre, edhe nëse nuk ishim dakord me ta dhe nuk kishim arritur më herët një pajtim politik, siç kërkohet nga Gjykata Kushtetuese. Kjo tregon se sa seriozisht e kanë trajtuar ata këtë çështje”, tha Murati.

Ai rikujtoi se Gjykata Kushtetuese kishte interpretuar më herët të drejtën e grupeve parlamentare për të propozuar anëtarë të kryesisë së Kuvendit.

“Vitin e kaluar, kur ne propozuam Albulena Haxhiun për kryetare të Kuvendit, Gjykata Kushtetuese sqaroi se grupeve parlamentare nuk mund t’u mohohet e drejta kushtetuese për të propozuar anëtarët e kryesisë. Megjithatë, për zgjedhjen e tyre kërkohet që grupet parlamentare të sigurojnë dakordësi politike dhe 61 vota”, tha ai.

Sipas Muratit, partitë e tjera parlamentare nuk arritën marrëveshje me LVV-në, pavarësisht ftesës së kryeministrit Albin Kurti për takim.

“Grupet e tjera parlamentare nuk arritën një dakordësi me Lëvizjen Vetëvendosje. Kryeministri Kurti i ftoi për të diskutuar dhe për të gjetur një zgjidhje, por kjo ftesë nuk u pranua dhe marrëveshja nuk u arrit. Pavarësisht kësaj, ne vendosëm të vazhdonim, në mënyrë që Kuvendi të konstituohej dhe institucionet të mund të formoheshin”, përfundoi Murati.

Sa i përket votës së deputetit nga Lista Serbe dhe qëndrimit të LVV-së ndaj kësaj partie, Murati tha se qëllimi kryesor i Vetëvendosjes kishte qenë parandalimi i zgjedhjeve të reja dhe arritja e një marrëveshjeje për zgjedhjen e presidentit.

“Për ne, gjithmonë ka qenë thelbësore që të sigurohej zgjedhja e presidentit të vendit. Në mandatin e kaluar, Kuvendi dhe Qeveria u formuan në një kohë rekord dhe nuk pati problem në këtë drejtim. Kriza u shfaq te zgjedhja e presidentit, pasi opozita nuk qëndroi në sallë, duke e çuar vendin në zgjedhje”, tha Konjufca.

Ai shtoi se pikërisht për të mos lejuar përsëritjen e këtij zhvillimi, LVV-ja kishte kërkuar një marrëveshje politike para konstituimit të Kuvendit dhe nisjes së afateve.

“Për ta shmangur me çdo kusht një tjetër proces zgjedhor, Lëvizja Vetëvendosje këmbënguli që dakordësia të arrihej përpara konstituimit të Kuvendit dhe para se të fillonin të rridhnin afatet kushtetuese”, u shpreh ai.

Murati bëri të ditur se LVV-ja kishte lidhur një marrëveshje me Lidhjen Demokratike të Kosovës, por ajo nuk ishte mbështetur nga të gjithë deputetët e kësaj partie.

“Ne arritëm një marrëveshje me Lidhjen Demokratike të Kosovës, por ajo nuk mund të konsiderohet e plotë, pasi LDK-ja dhe disa prej deputetëve të saj shprehën rezerva për marrëveshjen dhe për kandidatin konsensual, profesor doktor Bekim Sejdiun”, tha ai.

Sipas tij, LVV-ja kishte vendosur t’i mbështeste kandidatët e partive të tjera për nënkryetarë, me kushtin që ato të merrnin pjesë në seancë dhe të krijonin mundësinë për zgjedhjen e presidentit.

“Në kuadër të marrëveshjes politike, ne do t’i përdornim 53 votat tona për kandidatët e tyre për nënkryetarë. Në këmbim, ata duhej të pajtoheshin të merrnin pjesë në seancë, të paktën duke votuar kundër, në mënyrë që të mundësohej zgjedhja e presidentit. Ky ishte qëllimi i kësaj formule”, deklaroi ai.

Kur opozita refuzoi të përfshihej në proces, LVV-ja, sipas Muratit, vendosi të mos e mbante më peng konstituimin e Kuvendit.

“Kur u bë e qartë se ata synonin ta vazhdonin bllokadën dhe nuk kishin interes ta konstituonin Kuvendin, ne vendosëm të vepronim në mënyrë racionale. Kuvendi u konstituua dhe tani shpresojmë që ky vullnet i mirë i Lëvizjes Vetëvendosje të kuptohet si i tillë. Deputetët e tjerë të opozitës duhet të reflektojnë dhe, në seancën për zgjedhjen e presidentit, të qëndrojnë në sallë e të votojnë, në mënyrë që vendi të mos shkojë sërish në zgjedhje”, tha ai.

I pyetur për votën e deputetit nga Lista Serbe, Konjufca deklaroi se posti i nënkryetarit që përfaqëson komunitetin serb, si komunitet jo shumicë, përcaktohet nga Kushtetuta. Ai tha se vendimi i Gjykatës Kushtetuese ia njeh këtë të drejtë Listës Serbe.

“Kushtetuta përcakton qartë çështjen e nënkryetarit që vjen nga komuniteti serb, i cili është komunitet jo shumicë. Gjatë vitit të kaluar, në legjislaturën e vitit 2015, ne kundërshtuam dhe vazhduam procedurën për votimin e zotëri Nenad Rašić”, tha ai.

Konjufca sqaroi se, sipas Gjykatës Kushtetuese, posti i nënkryetarit i takon Listës Serbe për sa kohë që kjo parti përbën shumicën e deputetëve serbë në Kuvend.

“Në fillim të vitit 2026, Gjykata Kushtetuese vendosi se, nëse Lista Serbe ka shumicën e deputetëve të komunitetit serb, nuk mund të propozohet kandidat tjetër. Pra, të drejtën për këtë post ia ka dhënë Listës Serbe Gjykata Kushtetuese dhe jo ne”, deklaroi ai.

Ai theksoi se LVV-ja në legjislaturat e mëparshme kishte votuar kundër kandidatëve të Listës Serbe, duke synuar që në kryesi të zgjidhej një përfaqësues tjetër i komunitetit serb jo shumicë.

“Në legjislaturat e kaluara kemi votuar kundër të gjithë kandidatëve të Listës Serbe, me synimin që të arrihej zgjedhja e kandidatit të vetëm që nuk i përkiste kësaj liste. Por vendimi i Gjykatës Kushtetuese në fillim të këtij viti përcaktoi se kjo pozitë i takon Listës Serbe për aq kohë sa ajo ka shumicën e deputetëve të komunitetit serb jo shumicë në Kuvendin e Republikës së Kosovës”, shtoi ai.