Mihali: Kanë mbetur shtatë ditë për zgjedhjen e Presidentit, më pas mund të ketë zgjedhje

Dejona Mihali, përfaqësuese e Lëvizjes Vetëvendosje, ka deklaruar se afati për zgjedhjen e Presidentit të Kosovës përfundon pas shtatë ditësh.

Sipas saj, nëse Kuvendi dështon ta zgjedhë Presidentin, Kosova mund të përballet me zgjedhje të reja në fillim ose në mes të nëntorit.

Mihali ka shprehur kritika edhe për vonesën e Gjykatës Kushtetuese në publikimin e aktgjykimit, duke theksuar se për momentin nuk dihet se cilat do të jenë hapat e ardhshëm.

Në reagimin e saj, ajo ka vënë në pikëpyetje edhe seriozitetin e vendimmarrjes, si për përmbajtjen e vendimit të marrë, ashtu edhe për zvarritjen e aktgjykimit.

Mihali ka kritikuar gjithashtu ata që e kanë dërguar çështjen në Gjykatën Kushtetuese, deputetët që nuk duan të votojnë për Presidentin, si dhe ata që shkojnë në Kuvend, fotografohen dhe krijojnë përshtypjen se janë të gatshëm të nisin punën.

Në postimin e saj, ajo ka shkruar se kanë mbetur vetëm shtatë ditë nga afati për zgjedhjen e Presidentit dhe se, në rast të dështimit të Kuvendit, zgjedhjet mund të mbahen në fillim ose në mes të nëntorit.

Ajo ka theksuar se Gjykata Kushtetuese ende nuk e ka nxjerrë aktgjykimin dhe se askush nuk e di se si do të vazhdohet më tej.