Mesazhi i protestuesve: Tubimet nuk ndalen deri në miratimin e ndryshimeve në Ligjin për Specialen

Protestat “Jo në emrin tim” po mbahen në sheshin “Skënderbeu” në Prishtinë që nga 16 shtatori, kur Gjykata Speciale në Hagë shpalli aktgjykimin dënues për katër drejtuesit e UÇK-së.

Qytetarët e mbledhur atje kërkojnë miratimin në lexim të dytë të Projektligjit për ndryshime-plotësime të Ligjit për Specialen në Hagë dhe kanë bërë thirrje që protestat të vazhdojnë deri në përmbushjen e kërkesave të tyre.

Hajdin Daga nga Lipjani, i cili është pensionist në Zvicër, deklaroi për kp se iu bashkua tubimit për të mbështetur kauzën, teksa kritikoi zhvillimet e fundit politike.

Ai tha se po e përkrah këtë ligj dhe se kjo është më e pakta që mund të bëjë. Sipas tij, në shesh duhet të dalin dy milionë shqiptarë për të parë se kryeministri aktual nuk po e lejon dhe se po shpallet “mbret i shqiptarëve”. Daga rrëfeu se mbrëmjen e kaluar kishte qarë si fëmijë para gruas dhe fëmijëve të tij, kur u arrit marrëveshja e Rrahman Ramës me komandantin e policisë. Ai shtoi se kurrë nuk e kishte menduar se do të kishte një marrëveshje shtetërore dhe patriotike shtetërore, ndërsa theksoi se policët tanë i kishte sjellë UÇK-ja. Duke përmendur tri shkronjat, ai tha se nuk kishte pasur fatin të ishte në luftë, por tani e ka fatin ta përkrahë ligjin dhe kjo është gjithçka që mund të bëjë.

Veli Morina nga Klina tha se tubuesit do të qëndrojnë në shesh deri në miratimin e Ligjit për Specialen. Sipas tij, ose fitohet ligji ose bie qeveria, ndërsa nuk munden me i bërë votat. Ai shtoi se qytetarët do të dalin sërish në rrugë dhe se sheshi është i bllokuar; ata do të qëndrojnë sonte, ashtu siç kanë qenë aty që nga mbrëmja e kaluar.

Përparim Berisha nga Grabovci tha se ka ardhur nga Gjermania për të marrë pjesë në protestë. Ai tregoi se ka 33 vjet në Gjermani dhe se prej datës 16 ndodhet në shesh, ku do të qëndrojë deri në zgjidhjen e çështjes. Sipas tij, ai qëndron në shesh për të drejtat e UÇK-së dhe për çlirimtarët tanë, në mënyrë që ata të vijnë të lirë në vendin tonë. Berisha shtoi se kjo është më e pakta që mund të bëhet për ta.

Shaban Shabani nga Komuna e Drenicës tha se protestat janë e vetmja rrugë për të kërkuar zgjidhje. Ai theksoi se veç me protesta nuk ka tjetër zgjidhje, pasi nuk po duan marrëveshje. Sipas tij, duhen protesta derisa të lirohen çlirimtarët e Kosovës.