Maqedonci në Slloveni: Kosova synon anëtarësimin në NATO dhe BE

Ministri i Mbrojtjes i Republikës së Kosovës, Ejup Maqedonci, ishte pjesë e takimit ministror të Bashkëpunimit të Mbrojtjes së Evropës Qendrore (CEDC) me vendet partnere të Ballkanit Perëndimor. Takimi u zhvillua në Brdo pranë Kranjit, në Slloveni.

Gjatë diskutimeve, Maqedonci theksoi se Kosova e ka përcaktuar qartë orientimin e saj strategjik drejt Bashkimit Evropian dhe NATO-s. Ai vlerësoi gjithashtu se bashkëpunimi mes vendeve të rajonit është i rëndësishëm për rritjen e sigurisë dhe ruajtjen e stabilitetit.

Ministri kosovar nënvizoi se siguria në Evropën Qendrore dhe në Ballkanin Perëndimor është e lidhur ngushtë. Në fjalën e tij, ai paraqiti përparimin e Kosovës në krijimin e një force profesionale dhe të aftë për të bashkëvepruar me partnerët, ndërsa renditi si prioritete përfundimin e tranzicionit të Forcës së Sigurisë së Kosovës, rritjen e qëndrueshmërisë kombëtare dhe zhvillimin e industrisë së mbrojtjes.

Në margjinat e takimit, Maqedonci zhvilloi bisedime dypalëshe me zëvendëskryeministrin dhe ministrin e Mbrojtjes të Republikës Çeke, Jaromir Zuna, si dhe me ministrin e Mbrojtjes së Republikës së Sllovenisë, Valentin Hajdinjak.

Gjatë takimit me Jaromir Zuna, palët shqyrtuan mundësitë për zgjerimin e bashkëpunimit në mbrojtje. Vëmendje e veçantë iu kushtua industrisë së mbrojtjes, transferimit të teknologjisë, trajnimit dhe edukimit ushtarak.

Me homologun slloven, Valentin Hajdinjak, ministri Maqedonci diskutoi për mbështetjen që Sllovenia i jep Kosovës në procesin e saj drejt anëtarësimit në Bashkimin Evropian dhe NATO.

Maqedonci e informoi Hajdinjakun edhe për rezultatet e arritura nga Republika e Kosovës në sektorin e mbrojtjes, duke përfshirë rritjen e kapaciteteve të FSK-së dhe planet për zhvillimin e industrisë së mbrojtjes.

Ministri Hajdinjak shprehu gatishmërinë e Sllovenisë për të thelluar e zgjeruar bashkëpunimin dypalësh në fushën e mbrojtjes. Ai deklaroi gjithashtu se Sllovenia do të vijojë të kontribuojë në sigurinë e Kosovës përmes pjesëmarrjes në misionin e KFOR-it.

Pjesëmarrja e Kosovës në takimin ministror të CEDC-së dhe bisedimet me partnerët evropianë pasqyrojnë angazhimin e saj për forcimin e bashkëpunimit ndërkombëtar në mbrojtje, avancimin e partneriteteve strategjike dhe dhënien e kontributit në sigurinë rajonale e evropiane.