Maqedonci dekoron senatoren Joni Ernst me Medaljen për Shërbim të Shquar

Senatorja amerikane Joni Ernst është nderuar nga ministri në detyrë i Mbrojtjes, Ejup Maqedonci, me Medaljen për Shërbim të Shquar. Dekorata iu nda për kontributin e saj në fuqizimin e raporteve mes Kosovës dhe Shteteve të Bashkuara të Amerikës, si dhe për përkrahjen e dhënë ndaj Ministrisë së Mbrojtjes dhe Forcës së Sigurisë së Kosovës (FSK).

Të martën, Maqedonci e priti senatoren Ernst në Ministrinë e Mbrojtjes, ku ajo shoqërohej nga delegacioni i Gardës Kombëtare të Iowa-s, i udhëhequr nga gjenerali Stephen Osborn.

Maqedonci bëri të ditur se pati nderin t’ia ndante këtë medalje senatores Ernst në shenjë vlerësimi për kontributin e çmuar që ajo ka dhënë ndër vite në forcimin e marrëdhënieve Kosovë–SHBA dhe për mbështetjen e pandërprerë ndaj Ministrisë së Mbrojtjes dhe FSK-së.

Sipas tij, në takim u trajtua partneriteti mes Kosovës dhe Shteteve të Bashkuara, ndërsa u shqyrtuan edhe mundësitë për zgjerimin e bashkëpunimit në sektorët e mbrojtjes dhe sigurisë.

Ministri në detyrë deklaroi se raportet me SHBA-në dhe bashkëpunimi i posaçëm me Gardën Kombëtare të Iowa-s kanë qenë dhe vazhdojnë të mbeten ndër bazat më të rëndësishme për zhvillimin profesional e institucional të FSK-së, si dhe për rritjen e kapaciteteve mbrojtëse të Kosovës.

Ai shtoi se Kosova çmon përkrahjen e miqve që kanë ndihmuar në fuqizimin e shtetit dhe të sigurisë.

Në përfundim, Maqedonci theksoi se miqësia dhe partneriteti me Shtetet e Bashkuara të Amerikës mbeten të pazëvendësueshme për Kosovën.