Lawton: Paqja mes Kosovës dhe Serbisë, kyçe për stabilitetin e Ballkanit Perëndimor

Zëvendësndihmëssekretari amerikan i Shtetit për çështjet evropiane, Daniel Lawton, ka deklaruar se Uashingtoni vazhdon të mbështesë integritetin territorial dhe interesat e Kosovës. Ai theksoi se normalizimi i raporteve ndërmjet Kosovës dhe Serbisë është i domosdoshëm për stabilitetin e Ballkanit Perëndimor.

Gjatë dëshmisë së tij para Nënkomisionit për Evropën të Komitetit për Punë të Jashtme të Dhomës së Përfaqësuesve të SHBA-së, Lawton tha se ruajtja e stabilitetit në Ballkanin Perëndimor është ndër prioritetet kryesore të politikës amerikane në këtë rajon.

Sipas tij, Shtetet e Bashkuara synojnë një Ballkan Perëndimor paqësor dhe prosperues, ndërsa bashkëpunimi me aktorët rajonalë po zhvillohet për forcimin e stabilitetit, zgjerimin e lidhjeve ekonomike dhe përballjen me kërcënimet ndaj SHBA-ve.

Lawton nënvizoi se Shtetet e Bashkuara vijojnë të jenë të përkushtuara ndaj sovranitetit dhe integritetit territorial të Bosnjës dhe Hercegovinës, si dhe të Kosovës.

Ai deklaroi se SHBA-ja mbështet njohjen ndërkombëtare të Kosovës, përfshirë njohjen nga katër shtetet anëtare të NATO-s që ende nuk e kanë njohur pavarësinë e saj. Sipas tij, kjo agjendë është dëmtuar nga zgjedhjet e përsëritura dhe vonesat në krijimin e institucioneve, ndaj liderëve kosovarë u është bërë thirrje që ta përmbyllin procesin në përputhje me vendimet e Gjykatës Kushtetuese.

Zyrtari amerikan shtoi se KFOR-i do të vazhdojë të qëndrojë në Kosovë për garantimin e një mjedisi të sigurt, me mbështetjen e kontributeve të Shteteve të Bashkuara.

Duke iu referuar raporteve mes Kosovës dhe Serbisë, Lawton vlerësoi se ruajtja e paqes ndërmjet dy vendeve është një kusht thelbësor për stabilitetin e gjithë Ballkanit Perëndimor.

Ai tha se përparimi i rëndësishëm i arritur përmes marrëveshjes së vitit 2020 me presidentin Trump ndërmjet Kosovës dhe Serbisë ka mbetur në vend, për shkak të mungesës së vullnetit politik nga të dyja palët në dialogun e ndërmjetësuar nga Bashkimi Evropian.

Lawton u bëri thirrje Beogradit dhe Prishtinës që të heqin dorë nga provokimet dhe të angazhohen në bisedime pa parakushte, duke theksuar se normalizimi i marrëdhënieve mes dy vendeve është jetik për stabilitetin rajonal.

Ndërkohë, ai bëri të ditur se SHBA-ja po bashkëpunon nga afër me aleatët e NATO-s në rajon, mes tyre Shqipërinë, Malin e Zi dhe Maqedoninë e Veriut, në funksion të objektivave të përbashkëta në fushën e sigurisë.

Lawton shpjegoi se politika amerikane në Ballkanin Perëndimor mbështetet në tri drejtime kryesore: ruajtjen e stabilitetit, zhvillimin e interesave ekonomike dhe bashkëpunimin kundër organizatave kriminale dhe rreziqeve të sigurisë.

Shtetet e Bashkuara, sipas tij, duan një Ballkan Perëndimor paqësor dhe me prosperitet, ndërsa presin që vendet e rajonit të marrin përgjegjësi më të mëdha për zgjidhjen e sfidave të tyre.