Kuvendi përfshin në rend dite Ligjin për Specialen, Çitaku premton ndryshime brenda dy javësh

Me 79 vota për, Kuvendi i Kosovës vendosi ta përfshijë në rendin e ditës Projektligjin për plotësimin dhe ndryshimin e Ligjit për Dhomat e Specializuara dhe Zyrën e Prokurorit të Specializuar. Projektligji ishte miratuar në dy lexime më 6 tetor, por presidentja Justina Shiroka-Pula e ktheu në Kuvend me kërkesë të PDK-së.

Pas kërkesës së ushtrueses së detyrës së kryetares së Partisë Demokratike të Kosovës (PDK), Vlora Çitaku, kjo çështje u caktua si pika e fundit e seancës së sotme. Çitaku u bëri thirrje deputetëve ta miratojnë ligjin sot dhe, menjëherë pas kësaj, të nisin amendamentimin e tij, proces për të cilin propozoi një afat dyjavor.

Ajo tha se PDK-ja kishte marrë këshilla dhe rekomandime që, sipas saj, do ta forconin ligjin dhe do ta bënin juridikisht më të qëndrueshëm përballë kundërshtimeve të mundshme në fazat e mëtejshme. Çitaku u shpreh se partia e kishte marrë vendimin duke e ditur se mund t’i kushtonte politikisht, por duke vlerësuar se qëllimi kishte më shumë rëndësi se dëmi i mundshëm për PDK-në. Ajo shtoi se besonte se ligji mund të ndryshohej dhe se, pavarësisht mospajtimeve procedurale gjatë diskutimeve me eksponentë të lartë të LVV-së dhe grupet parlamentare që e kishin mbështetur, për përmbajtjen kishte pasur dakordim. Çitaku u zotua publikisht se të hënën do të paraqiste nismën e re ligjore dhe se ndryshimet do të bëheshin brenda dy javësh.

Për futjen e projektligjit në rendin e ditës u shpreh edhe shefja e Grupit Parlamentar të Lëvizjes Vetëvendosje, Arbërie Nagavci. Sipas saj, LVV-ja vlerësonte se as projektligji, as mënyra e trajtimit të tij nuk përbënin rrugën e duhur. Megjithatë, duke qenë se PDK-ja besonte në këtë projektligj, LVV-ja vendosi ta mbështeste kërkesën, me mundësinë që çështja të diskutohej sërish.

Shefja e Grupit Parlamentar të LDK-së, Jehona Lushaku, deklaroi se partia e saj nuk e kishte ndryshuar qëndrimin për Ligjin për Specialen që nga koha kur ai u propozua për herë të parë.

Gjatë diskutimit, Çitaku dhe kryetarja e Kuvendit, Albulena Haxhiu, patën një përplasje për radhitjen e pikës. Çitaku kërkoi që ajo të shqyrtohej menjëherë pas pyetjeve parlamentare, ndërsa Haxhiu kundërshtoi ndryshimin dhe tha se do të mbetej në fund të rendit të ditës. Ajo i kërkoi Çitakut të mos e cenonte me një propozim tjetër deklarimin dhe vullnetin e shumicës, si dhe u bëri thirrje deputetëve të mos paraqisnin kërkesa të tjera, duke përmendur ndjeshmërinë e çështjes dhe debatet rreth saj.