Kusari-Lila: Presidenti të zgjidhet fillimisht, pastaj të procedohet ndryshimi i ligjit për Dhomat e Specializuara

Mimoza Kusari-Lila, kryetare e Alternativës, subjekt që bën pjesë në koalicionin fitues Vetëvendosje, u ka bërë thirrje partive politike që fillimisht të dakordohen për një kandidat konsensual për president dhe vetëm më pas të ndërmarrin ndryshimet në Ligjin për Dhomat e Specializuara.

Ministrja e Industrisë, Ndërmarrësisë dhe Tregtisë tha se ky proces duhet të përmbyllet para 6 tetorit, me qëllim shmangien e zgjedhjeve të reja.

Sipas saj, përparësi duhet t’i jepet zgjedhjes së presidentit, ndërsa më pas partitë duhet të bashkëpunojnë për ndryshimin e ligjit dhe mbështetjen e ekipeve mbrojtëse në procesin e apelit.

Kusari-Lila theksoi se afatet për çështjen e krerëve të UÇK-së janë të ngushta dhe se lënda duhet të dorëzohet sa më shpejt.

Ajo rikujtoi se afati për apelimin e aktgjykimit të Dhomave të Specializuara të Hagës është 30 ditë nga prezantimi ose publikimi i tij. Deri tani, sipas saj, është bërë publik vetëm njoftimi për verdiktin, ndërsa aktgjykimi i plotë ende nuk është publikuar.

Ministrja sqaroi se afati 30-ditor, në raport me datën 6 tetor të përcaktuar nga Gjykata Kushtetuese, përfundon më 16 tetor. Pas kësaj, janë në dispozicion edhe 60 ditë të tjera për paraqitjen e plotë të lëndës, afat që përfundon pas 10 dhjetorit.

Duke folur për takimet ndërmjet partive politike lidhur me zgjedhjen e presidentit, Kusari-Lila tha se ekziston vullneti për të arritur një marrëveshje, duke e cilësuar konsensusin si mundësinë e vetme për zgjedhjen e kreut të shtetit para 6 tetorit.

Ajo deklaroi se vullneti për marrëveshje ka ekzistuar, ekziston dhe do të vazhdojë të jetë i pranishëm, por theksoi se pajtueshmëria mund të arrihet vetëm përmes takimeve dhe vendimeve të përbashkëta të liderëve politikë.

Kusari-Lila tha se deri më 6 tetor duhet të arrihet marrëveshja për presidentin, të përcaktohen vendimet dhe hapat për miratimin e projektligjit, si dhe të koordinohet asistenca për ekipet mbrojtëse në Hagë.