Kurti takon liderët shqiptarë të Luginës dhe rithekson mbështetjen e Kosovës

Kryeministri i Kosovës, Albin Kurti, priti në Zyrën e Kryeministrit përfaqësues politikë dhe institucionalë të shqiptarëve të Preshevës, Bujanocit dhe Medvegjës, në ditën e dytë të punës pas rizgjedhjes së tij në krye të Qeverisë.

Lajmin për takimin Kurti e bëri të ditur përmes një postimi në Facebook, ku sqaroi se në bisedë ishin përfaqësues të disa subjekteve politike shqiptare nga Lugina e Preshevës, drejtuesit e komunave dhe përfaqësues të Këshillit Kombëtar Shqiptar.

Në takim morën pjesë Shaip Kamberi nga PVD-ja, Visar Memeti nga APN-ja, Shqiprim Musliu nga LPD-ja, Sami Salihu nga LR, Armend Aliu nga AL-ja, Sali Salihu nga PD-ja, si dhe Agim Sabedini dhe përfaqësues të PDSH-së. Të pranishëm ishin edhe kryetarja e Komunës së Preshevës, Ardita Sinani, kryetari i Komunës së Bujanocit, Arbër Pajaziti, kryetari i Këshillit Kombëtar Shqiptar, Enkel Rexhepi, si dhe Arben Ferati nga Medvegja.

Kurti deklaroi se takimi i shërbeu dëgjimit të qëndrimeve të përfaqësuesve të Luginës dhe diskutimit për vështirësitë me të cilat përballen shqiptarët atje. Sipas tij, bashkërendimi politik është i rëndësishëm për mbrojtjen e të drejtave dhe forcimin e përfaqësimit të tyre, veçanërisht në Kuvend.

Ai theksoi se shqiptarët e Luginës kanë nevojë për bashkëpunim dhe përgjegjësi të përbashkët. Edhe pse dallimet mes partive janë pjesë e demokracisë, interesi i qytetarëve, sipas tij, duhet të jetë pika ku bashkohen angazhimet e të gjithë aktorëve.

Kryeministri nënvizoi gjithashtu se mbështetja për shqiptarët e Preshevës, Bujanocit dhe Medvegjës mbetet një zotim i vazhdueshëm i Qeverisë së Republikës së Kosovës. Ai tha se Kosova do të qëndrojë pranë tyre në mbrojtjen e të drejtave, ruajtjen e identitetit dhe përmirësimin e kushteve të jetës së përditshme.