Kurti pas takimit me Valentinën Superti: BE-ja duhet t’i përgjigjet Kosovës me gatishmëri për anëtarësim

Kryeministri në detyrë i Kosovës, Albin Kurti, zhvilloi një takim me drejtoren për Zgjerim dhe Fqinjësi të Bashkimit Evropian për Ballkanin Perëndimor, Valentina Superti, e cila po qëndron për herë të parë për vizitë në Republikën e Kosovës.

Në një reagim të publikuar në Facebook, Kurti vlerësoi se Kosova është “lidere rajonale në sundimin e ligjit, luftën kundër korrupsionit, të drejtat politike, liritë civile, si dhe në indekset e zgjedhjeve dhe demokracive liberale”. Ai theksoi gjithashtu se vendi ka bërë përparim në reformat europiane, është plotësisht “i linjëzuar me politikën e jashtme dhe të sigurisë të Bashkimit Europian”, si dhe “ka regjistruar rritje të vazhdueshme ekonomike”.

Sipas tij, për herë të parë në 15 vjet, Kosova është hequr nga listat e vendeve të brishta dhe të ndikuara nga konfliktet nga Banka Botërore dhe Fondi Monetar Ndërkombëtar.

“Bashkimi Evropian është kontribues i madh në zhvillimin e Republikës sonë, ndërsa anëtarësimi është qëllimi dhe e ardhmja e Kosovës. Vullnetit të popullit tonë për anëtarësim, BE-ja duhet t’i përgjigjet me vullnet të ndërsjellë për pranim. Statusi i vendit kandidat dhe hapja e negociatave, janë pikënisje e një procesi nga i cili Kosova forcon demokracinë dhe zhvillohet edhe më shumë”, shkroi Kurti.

Ai bëri të ditur se në takim u trajtuan edhe tema që lidhen me “Planin e Rritjes, integrimin në zonën ‘Roam Like at Home’, Procesin e Berlinit, bashkëpunimin rajonal dhe përfaqësimin e barabartë, sikurse edhe infrastrukturën, tregtinë, digjitalizimin e arsimin”.