Kurti kërkon çeljen e arkivave të Brigadës së Motorizuar 37 të ish-Ushtrisë Jugosllave

Kryeministri në detyrë i Kosovës, Albin Kurti, gjatë paraqitjes së raportit për gërmimet në Zubin Potok, ka përsëritur kërkesën që të hapet arkivi i Brigadës së Motorizuar 37 të ushtrisë ish-jugosllave. Sipas tij, kjo njësi ka kryer masakra veçanërisht në Drenicë, por edhe në pjesë të tjera të Kosovës, raporton KosovaPress.

Kurti tha se dokumentacioni i kësaj brigade ishte klasifikuar para 12 vjetësh për një periudhë 30-vjeçare, çka nënkupton se ai do të vazhdojë të mbetet i mbyllur edhe për 18 vjet. Ai theksoi se familjet, të cilat kanë pritur prej 27 dhe 28 vjetësh për të mësuar fatin e të afërmve, nuk duhet të përballen me pritje, ankth dhe dhimbje për 18 vjet të tjera.

Sipas tij, presioni ndërkombëtar është vendimtar për këtë çështje. Kurti kërkoi që Serbia t’i hapë menjëherë dosjet e arkivuara dhe të klasifikuara të Brigadës së Motorizuar 37 të Ushtrisë Jugosllave, pra gjatë vitit 2024 dhe jo në vitin 2044.

Ai u ndal edhe te gërmimet e zhvilluara në veriun e Kosovës, duke thënë se, sipas prezantimit të hollësishëm të Komisionit, ato kanë qenë të kufizuara dhe janë kryer në kushte të vështira. Shpesh, sipas Kurtit, procesi është penguar nga pasiguria, çka dëshmon se lufta kundër bandave kriminale dhe vendosja e rendit e ligjit në këtë pjesë të vendit kanë qenë parakusht për hetime, kërkime dhe gërmime të suksesshme e pa pengesa.

Kryeministri në detyrë deklaroi gjithashtu se bashkësia ndërkombëtare duhet ta rrisë trysninë ndaj Serbisë për zbatimin e deklaratës për personat e zhdukur me dhunë.

Ai tha se qindra familje jo vetëm kërkojnë sqarimin e fatit të njerëzve të tyre më të afërt, por edhe drejtësi. Sipas Kurtit, Serbia ua ka mohuar dhe vazhdon t’ua mohojë të dyja, duke fshehur dhe mospranuar krimet, duke refuzuar hapjen e arkivave dhe duke i klasifikuar ato, me synimin për të shtrembëruar të vërtetën dhe për t’iu shmangur përgjegjësisë.

Kurti shtoi se Serbia arreston dhe përndjek edhe serbët e paktë që kanë guxuar të dëshmojnë para institucioneve ndërkombëtare. Për këtë arsye, ai vlerësoi se faktorët ndërkombëtarë duhet të ushtrojnë më shumë presion mbi fqinjin verior që të zbatojë deklaratën e dakorduar në Bruksel më 2 maj 2023 për personat e zhdukur me dhunë, duke hapur dhe vënë në dispozicion arkivat shtetërore që mund të ndihmojnë në zbardhjen e fatit të të pagjeturve.

Sipas autoriteteve të Kosovës, deri tani rreth 1600 persona vazhdojnë të jenë të pagjetur në Kosovë.