Kurti dhe Hamza nisin takimin, në fokus zgjedhja e presidentit dhe ndryshimet për Specialen

Kryeministri dhe kryetari i Lëvizjes Vetëvendosje, Albin Kurti, ka nisur takimin me kryetarin e PDK-së, Bedri Hamza. Në qendër të bisedimeve pritet të jenë zgjedhja e presidentit të ri dhe procedimi i ndryshimeve në Ligjin për Gjykatën Speciale.

Bedri Hamza mbërriti në ndërtesën e Qeverisë i shoqëruar nga deputeti Rrahman Rama.

Partia Demokratike e Kosovës e ka lidhur diskutimin për presidentin me avancimin e ndryshimeve në Ligjin për Dhomat e Specializuara.

Qeveria ka njoftuar se gjatë kësaj jave pret një opinion ligjor nga Ministria e Drejtësisë për propozimet e paraqitura.

Sipas projektligjit të propozuar, PDK-ja synon që mandati i Gjykatës Speciale të kufizohet vetëm në trajtimin e krimeve të pretenduara në raportin e Dick Martyt, si dhe të vendoset monitorim ndërkombëtar mbi punën e saj. Ndërkohë, krimet e luftës për të cilat janë dënuar katër drejtues të UÇK-së parashihet të gjykohen në Kosovë.

Kuvendi i Kosovës ka kohë deri më 6 tetor për ta zgjedhur presidentin e ri; në të kundërtën, vendi shkon në zgjedhje të reja.

Takimi u zhvillua pasi Kurti deklaroi se kanë nisur komunikimet për arritjen e një marrëveshjeje rreth zgjedhjes së presidentit.

“Kemi filluar komunikimet dhe, natyrisht, kjo fundjavë është vendimtare për të pasur një marrëveshje, që javën e ardhshme të kemi presidentin”, ka deklaruar Kurti.