Kryeziu: Kuvendi dhe Qeveria duhet të formohen para se të shqyrtohet çështja e presidentit

Deputetët e zgjedhur pritet të rikthehen më 9 shtator në seancën konstituive të Kuvendit të Kosovës, me synimin për të vijuar procedurat që do t’i hapnin rrugë krijimit të institucioneve të reja pas zgjedhjeve të qershorit.

Konstituimi i Kuvendit është bllokuar prej një kohe të gjatë, duke ndikuar edhe në formimin e organeve të tjera shtetërore. Përmbyllja e këtij procesi konsiderohet thelbësore për zhbllokimin e situatës politike, e cila ka hyrë në vitin e dytë të krizës.

Seanca e 9 shtatorit do të tregojë nëse partitë politike do të arrijnë një marrëveshje për sigurimin e votave të nevojshme dhe funksionalizimin e Kuvendit. Nga rezultati i saj mund të varet edhe ecuria e mëtejshme e krijimit të institucioneve të reja të Kosovës.

Kadri Kryeziu, ish-gjyqtar i Gjykatës Kushtetuese, ka theksuar se rendi i veprimeve duhet të nisë me konstituimin e Kuvendit, të vijojë me formimin e Qeverisë dhe vetëm më pas të trajtohet zgjedhja e presidentit.

“Mendoj se duhet të konstituohet parlamenti, qeveria e pastaj presidenti nëse ka ndonjë marrëveshje.

Tani çdo veprim është politik”, deklaroi shkurt Kryeziu për “Bota sot”.

Ndërkohë, Partia Demokratike e Kosovës dhe Lidhja Demokratike e Kosovës, dy subjektet më të mëdha opozitare në vend, njoftuan të hënën se do të jenë pjesë e seancës për konstituimin e Kuvendit. Ky proces i hap rrugën formimit të Qeverisë së re dhe zgjedhjes së presidentit të ri.