Kroacia: Aktgjykimi i Hagës nuk e zhbën të vërtetën historike, Kosova ishte viktimë e regjimit të Millosheviqit

Ministria e Punëve të Jashtme e Kroacisë ka reaguar zyrtarisht pas aktgjykimit të Hagës ndaj ish-krerëve të UÇK-së, duke theksuar se e ka marrë në dijeni vendimin e Dhomave të Specializuara të Kosovës.

Në deklaratë, ministria sqaroi se bëhet fjalë për një vendim të shkallës së parë dhe jo përfundimtar, ndaj nuk dëshiron të paragjykojë përfundimin e procesit gjyqësor.

Sipas autoriteteve kroate, ky aktgjykim nuk ndryshon rrethanat historike të luftërave në Kosovë dhe as faktin se Kosova dhe popullsia e saj u përballën me represionin dhe krimet e rënda të regjimit të Millosheviqit.

Kroacia vlerëson gjithashtu se përgjegjësia individuale e personave të caktuar nuk duhet të përdoret për të relativizuar krimet e kryera apo për të vënë në diskutim lirinë dhe pavarësinë e Kosovës.