Kosova përkujton viktimat e 11 Shtatorit, godina e Qeverisë vishet me ngjyrat e flamurit amerikan

Godina e Qeverisë së Republikës së Kosovës është ndriçuar sonte me flamurin e Shteteve të Bashkuara të Amerikës, në përkujtim të viktimave të sulmeve terroriste të 11 Shtatorit 2001.

Në fasadën e ndërtesës është vendosur gjithashtu shkrimi “We Will Never Forget 9/11”, si mesazh nderimi për njerëzit që humbën jetën në atë tragjedi.

Përmes këtij veprimi, institucionet e Kosovës kanë përcjellë solidaritetin dhe respektin e tyre për viktimat e sulmeve, të cilat përkujtohen çdo vit në Shtetet e Bashkuara dhe në mbarë botën.

Më 11 shtator 2001, Shtetet e Bashkuara u përballën me një seri sulmesh terroriste të koordinuara, të cilat ndryshuan përgjithmonë historinë moderne. Terroristët e Al-Kaedës rrëmbyen katër avionë pasagjerësh; dy prej tyre u përplasën me Kullat Binjake të Qendrës Botërore të Tregtisë në Nju Jork, ndërsa një tjetër goditi Pentagonin.

Avioni i katërt, United Airlines Flight 93, u rrëzua në Pensilvani pasi pasagjerët dhe anëtarët e ekuipazhit u përpoqën të merrnin sërish kontrollin e tij. Sulmet shkaktuan vdekjen e rreth 3,000 njerëzve dhe plagosjen e mijëra të tjerëve. 11 Shtatori u bë një pikë kthese për sigurinë ndërkombëtare dhe politikën e jashtme amerikane, duke u pasuar nga lufta në Afganistan dhe një fushatë globale kundër terrorizmit.