Komunat protestojnë sot para Qeverisë kundër cenimit të buxheteve dhe kompetencave

Asociacioni i Komunave të Kosovës do të protestojë sot para ndërtesës së Qeverisë së Kosovës, në sheshin “Skënderbeu” në Prishtinë. Tubimi nis në orën 11:00 dhe është paralajmëruar si protestë paqësore, institucionale dhe jopartiake.

Përmes kësaj proteste, AKK-ja kërkon mbrojtjen e buxheteve, pronës dhe kompetencave të komunave, kompensimin e detyrimeve që burojnë nga kontratat kolektive, si dhe ndaljen e ndërhyrjeve të nivelit qendror në autonominë lokale.

Një ditë para tubimit, kryetari i Prishtinës, Përparim Rama, publikoi në Facebook një video ku ftoi qytetarët të marrin pjesë. Ai i kërkoi pushtetit qendror që të mos u marrë komunave atë që, sipas tij, u përket.

“Nuk mundesh me ua marrë qytetarëve buxhetin, me ua blloku projektet e me ua ndal zhvillimin vetëm pse nuk të kanë votuar. Kjo nuk është qeverisje. Është ndëshkim politik”, ka deklaruar Rama.

Sipas Ramës, fondet dhe projektet e pushtetit lokal po pengohen nga Qeveria në varësi të përkatësisë politike të komunave. Ai ka deklaruar se, prej vitit 2022, nga buxhetet komunale janë marrë mbi 344 milionë euro për detyrime të krijuara në nivelin qendror, ndërsa vetëm në katër muajt e parë të vitit 2026 shuma e marrë, sipas tij, arrin në rreth 55 milionë euro.

Thirrjes për pjesëmarrje në protestën e sotme në Prishtinë i është bashkuar edhe kryetari i Aleancës dhe i Komunës së Gjakovës, Ardian Gjini. Ai e konsideron veprimin e nivelit qendror si cenim të të drejtave ligjore dhe kompetencave të pushtetit lokal.

Gjini i ka cilësuar komunat si “adresën e parë të qytetarëve” dhe si hallkën kryesore të përfaqësimit të tyre në institucione. Në të njëjtën kohë, ai ka akuzuar autoritetet qendrore për ndërhyrje të jashtëligjshme dhe të motivuara politikisht në përgjegjësitë komunale.

Ndër shqetësimet e renditura prej tij janë shkurtimet e buxheteve, përjashtimi nga planifikimet financiare i mbi 3.100 mësimdhënësve dhe moskompensimi i dëmeve të shkaktuara nga fatkeqësitë natyrore. Gjini ka përmendur gjithashtu centralizimin e inspektorateve dhe të punësimit në shërbimin civil, si dhe kufizimet që, sipas tij, po u imponohen pronave komunale.