Koci kërkon shpjegime publike nga ekipet mbrojtëse të krerëve të UÇK-së për zhvillimet në Hagë

Avokati Arianit Koci u ka bërë thirrje përfaqësuesve ligjorë të drejtuesve të UÇK-së që të flasin para opinionit dhe të sqarojnë se çfarë ka ndodhur gjatë gjykimit në Gjykatën Speciale në Hagë.

Përmes një postimi në Facebook, Koci ngriti pyetjen se si u arrit deri te këto dënime, ku qëndronte problemi dhe përse nuk pati asnjë paralajmërim se procesi mund të merrte një përfundim të tillë.

Ai theksoi se interpretimet politike u përkasin çështjeve të brendshme, ndërsa nga ekipet e mbrojtjes kërkohet një shpjegim profesional, i drejtpërdrejtë dhe konkret.

Sipas Kocit, avokatët e kanë për detyrë t’u japin llogari qytetarëve, pasi kanë mbrojtur figurat më të larta shtetërore të Kosovës, përfshirë ish-presidentin e vendit.

Ai kujtoi gjithashtu se nga buxheti i Kosovës janë ndarë deri më tani rreth 40 milionë euro për mbrojtjen juridike të të gjithë të akuzuarve dhe të dyshuarve nga Haga, ndërsa vetëm për këta katër mbështetja e përgjithshme ka arritur në rreth 28.5 milionë euro.