Kinolli shpreh gatishmërinë për takim me Kurtin dhe votimin e qeverisë e të presidentit

Albert Kinolli, deputet i Partisë Rome të Bashkuar të Kosovës, deklaroi sot se janë të gatshëm të kontribuojnë në formimin e institucioneve të Kosovës dhe të zhvillojnë një takim me liderin e Lëvizjes Vetëvendosje, Albin Kurti.

Sipas tij, takimi me Kurtin mund të zhvillohet sot ose nesër. Kinolli theksoi gjithashtu se janë të gatshëm të japin votën edhe për presidentin.

“Nga të gjitha gjasat, takimin me Kurtin do ta zhvillojmë sot ose nesër. Shpresojmë që në parim të arrijmë marrëveshje, në mënyrë që të ecim përpara. Për ne kushti nuk është me interes, ndërsa rëndësi të veçantë ka që institucionet e Kosovës të formohen sa më shpejt. Natyrisht, jemi të gatshëm ta votojmë edhe presidentin”, u shpreh Kinolli, raporton KosovaPress.

Edhe kryetari i partisë boshnjake VAKAT, Rasim Demiri, njëherësh ministër në detyrë i Zhvillimit Rajonal, bëri të ditur se po mbajnë kontakte me Kurtin dhe se presin ta takojnë deri nesër.

“Jemi në komunikim me kryeministrin dhe besoj se do të takohemi me të, ashtu siç ka ndodhur edhe më herët. Mendoj se takimi me Kurtin do të realizohet deri nesër”, deklaroi Demiri, sipas KosovaPress.

Kuvendi i Kosovës pritet të mblidhet nesër, më 6 gusht, për seancën konstituive të legjislaturës së re, e planifikuar të fillojë në orën 10:00.