Ish-gjyqtari i Kushtetueses sqaron afatet dhe mundësinë e shtyrjes së seancës konstituive

Ish-gjyqtari i Gjykatës Kushtetuese, Kadri Kryeziu, ka bërë të ditur se presidenti i Kosovës duhet ta thërrasë seancën e parë konstituive të Kuvendit brenda 30 ditësh nga certifikimi i rezultateve, por kjo nuk nënkupton se institucioni duhet të formohet patjetër brenda asaj seance.

Gjatë emisionit “Speciale” në Klan Kosova, Kryeziu shpjegoi se mbledhja mund të thirret edhe para përfundimit të këtij afati, ndërsa pas thirrjes së saj seancat mund të shtyhen. Sipas tij, Rregullorja e Kuvendit përcakton që mbledhjet duhet të zhvillohen çdo 48 orë, derisa të zgjidhen strukturat ose udhëheqësia e Kuvendit.

Ai vlerësoi se, ndonëse seanca u thirr brenda periudhës 30-ditore, ajo është vonuar dhe, sipas mendimit të tij, do të duhej të mbahej më herët.

Kryeziu shtoi se do të ishte më e dobishme që Kuvendi të konstituohej sot ose nesër, së bashku me të gjithë mekanizmat e tij.