Imri Ahmeti apelon për dialog dhe tolerancë në LDK: Demokracia e brendshme është thelbësore për partinë

Imri Ahmeti, kryetar i Komunës së Lipjanit dhe anëtar i Kryesisë së Lidhjes Demokratike të Kosovës (LDK), ka reaguar lidhur me zhvillimet e fundit në parti, duke kërkuar forcimin e demokracisë së brendshme, dialogut dhe tolerancës.

Ahmeti ka theksuar se këto parime duhet të udhëheqin mënyrën e funksionimit të LDK-së, e cila, sipas tij, është themeluar mbi demokracinë, bashkëpunimin dhe durimin.

“Pa demokraci të brendshme, pa dialog, mirëkuptim dhe tolerancë, LDK-ja nuk është vetvetja!”, ka shkruar ai në një postim.

Sipas tij, brenda subjektit politik duhet të ketë hapësirë për mendime të ndryshme, ndërsa imponimi, përçarja dhe sulmet mes anëtarëve duhet të shmangen.

“Të dëgjosh para se të vendosësh, të bindësh e jo të imponosh, të bashkosh e jo të linqosh, janë parime fundamentale të funksionimit të LDK-së”, ka deklaruar Ahmeti.

Duke sqaruar se po shprehet “nga brenda”, ai ka kujtuar se është pjesë e LDK-së që nga themelimi i saj dhe se e ka përjetuar partinë në periudha të ndryshme.

Në reagimin e tij, Ahmeti ka kundërshtuar edhe atë që e quan prirje për “linçim” dhe akuza ndaj personave që, sipas tij, kanë kontribuar në mbijetesën e LDK-së gjatë momenteve më të vështira.

“Refuzoj që kaq lehtë të linqohen e të akuzohen ata që e kanë mbajtur gjallë LDK-në në ditët më të vështira, ndërsa të përkëdhelen turistët politikë”, ka shkruar ai.

Anëtari i Kryesisë së LDK-së ka shprehur kritika edhe ndaj përdorimit të fyerjeve dhe akuzave, duke vlerësuar se kjo qasje nuk përputhet me trashëgiminë dhe vlerat e partisë.

Ai ka thënë se LDK-ja është ngritur mbi respektin, dialogun dhe mirëkuptimin, ndaj nuk mund të drejtohet përmes “grushtit”, ngritjes së zërit apo imponimit.

“LDK-ja është e veçantë dhe pikërisht këtë veçanti duhet ta ruajmë”, ka theksuar Ahmeti.

Reagimin e tij e ka përmbyllur me një apel për më shumë dialog, mirëkuptim dhe respekt në radhët e partisë, duke nënvizuar se “LDK-ja është përgjegjësi e përbashkët”.