Humbet besimi i Shqipërisë te Kosova, Rama akuzohet se i jep përparësi Serbisë

Gazetari dhe analisti politik Ismail Muqiqi ka pohuar se prej kohësh mbështetja diplomatike e Shqipërisë për Kosovën ka rënë, duke e fajësuar për këtë gjendje kryeministrin Edi Rama.

Sipas tij, orientimi i Ramës ka bërë që Serbia të zërë një pozitë më të spikatur në marrëdhëniet e Tiranës, ndërkohë që Kosova është lënë në hije.

“Prej kohësh, Kosova nuk gëzon më përkrahjen e diplomacisë shqiptare. Fajtori kryesor për këtë është kryeministri i Shqipërisë, Edi Rama, i cili e ka ngritur Serbinë në plan të parë dhe e ka anashkaluar Kosovën”, ka theksuar Muqiqi.

Ai ka vlerësuar se Prishtina është përjashtuar nga prioritetet e politikës së Tiranës, duke e lidhur këtë me atë që e cilësoi si një vijë politike shkatërruese nga ana e kreut të qeverisë shqiptare.

“Sigurisht, Prishtina ka dalë jashtë fokusit kryesor në raport me Shqipërinë, për faj të qasjes destruktive të Edi Ramës, i cili vijon ta nëpërkëmbë dhe ta injorojë Kosovën. Ky është rezultat i politikës diplomatike të Ramës, e cila, mjerisht, e ka kthyer Kosovën në një çështje dytësore”, është shprehur ai.

Muqiqi ka theksuar se Shqipërisë i takon një peshë më e madhe në promovimin e çështjes kosovare në skenën ndërkombëtare dhe ka kërkuar një ndryshim rrënjësor në qëndrimin e Tiranës zyrtare.

“Assesi, Shqipëria e ka humbur orientimin dhe besueshmërinë në marrëdhëniet me Kosovën. Fatkeqësisht, Shqipëria është përgjegjëse për ta çuar përpara çështjen e Kosovës në diplomacinë globale. Ndaj, është momenti i fundit që ajo të ndryshojë krejtësisht politikën ndaj Kosovës”, ka deklaruar analisti politik dhe gazetari Ismail Muqiqi.