Hoxhaj: Protestat për UÇK-në po forcojnë patriotizmin dhe po krijojnë një testament të ri atdhedashurie

Deputeti i PDK-së, Enver Hoxhaj, deklaroi se protestat e përditshme në mbështetje të Ushtrisë Çlirimtare të Kosovës kanë nxitur një ndërgjegjësim të ri dhe një ndjenjë të ripërtërirë patriotizmi në shoqërinë kosovare.

Sipas tij, pjesëmarrja e gjerë e qytetarëve, me të rinj e të moshuar në mesin e protestuesve, dëshmon solidaritetin dhe lidhjen e fortë të shoqërisë me historinë e Kosovës.

Hoxhaj tha se dalja e përditshme e qytetarëve në protesta po sjell një vetëdije të re, e cila më pas po shndërrohet në vetëbesim më të madh.

Ai shprehu bindjen se Kosova mund ta përballojë këtë periudhë duke dalë prej saj më e fuqishme si shoqëri, ndërsa nënvizoi besimin e tij se beteja mund të fitohet edhe në Apel.

Deputeti i PDK-së theksoi se synimi nuk duhet të jetë vetëm fitorja në Apel, por edhe forcimi i shoqërisë pas përfundimit të kësaj beteje, pasi situata të tilla, sipas tij, krijojnë vetëbesim.

Hoxhaj vlerësoi se brezi i ri, i cili nuk e ka përjetuar jetën nën pushtim dhe e njeh atë periudhë vetëm përmes rrëfimeve të gjeneratave të mëparshme, duhet ta konsiderojë këtë mobilizim qytetar si një testament të ri të atdhedashurisë.

Ai u bëri thirrje qytetarëve që më 1 tetor të marrin pjesë në marsh, duke theksuar se solidariteti, dashuria për Ushtrinë Çlirimtare të Kosovës dhe mbrojtja e dinjitetit të saj duhet të mbeten të palëkundura.

Sipas Hoxhajt, sa më i madh të jetë mobilizimi qytetar dhe solidariteti, aq më e fortë do të jetë bindja se UÇK-ja, si faktor që solli lirinë, përfaqëson vlerën më të shenjtë të shoqërisë.

Ai shtoi se shqiptarët kanë kaluar nëpër shumë luftëra, kanë pasur udhëheqës e beteja të lavdishme gjatë historisë, por vetëm lufta e UÇK-së, në këta dy mijë vjet, përfundoi me çlirimin, krijimin e shtetit të Kosovës dhe pavarësinë e saj.

Hoxhaj nënvizoi gjithashtu se në atë luftë Kosova pati fatin t’i kishte edhe aleatët e saj.