Haziri para Kuvendit të LDK-së: Përmes dialogut do të përcaktojmë rrugën më të mirë

Para fillimit të punimeve të Kuvendit, nënkryetari i LDK-së, Lutfi Haziri, vlerësoi se interesimi i lartë për këtë proces dëshmon rëndësinë dhe ndikimin që partia, sipas tij, vazhdon të ketë në jetën politike të vendit.

Haziri bëri të ditur se, pavarësisht rezultatit të fundit zgjedhor, LDK-ja ka nisur një debat të brendshëm, në përputhje me parimet e demokracisë brenda partisë.

Ai deklaroi se LDK-ja është pjesë e proceseve politike dhe se pa të nuk mund të zhvillohen procese apo të përmbushen ëndrrat e askujt. Sipas tij, mocioni ka të bëjë me kryetarin e partisë dhe kjo mundësi është përdorur nga kolegët që e kanë organizuar atë.

Nënkryetari i LDK-së theksoi se partia e ka respektuar këtë procedurë dhe se gjatë ditës do të zhvillohet dialog për të gjetur zgjidhjen më të mirë, në mënyrë që kërkesa të trajtohet. Më pas, sipas tij, vëmendja duhet të kalojë te kërkesa e dytë, që përfshin shtetndërtimin, ngritjen e institucioneve, funksionimin e Republikës dhe çështjet që lidhen me të ardhmen.

Sa i përket mocionit, Haziri sqaroi se vendimmarrja u përket delegatëve të Kuvendit dhe se i gjithë procesi do të zhvillohet mbi bazën e Statutit të partisë.

Ai shtoi se kryetari i LDK-së e zhvillon betejën përballë delegatëve të LDK-së, ndërsa nënvizoi se çdo gjë është përcaktuar nga normat statutare dhe se partia do t’u qëndrojë atyre.