Haziri konfirmon pjesëmarrjen në seancë dhe bën thirrje për respektimin e Kushtetutës

Para fillimit të seancës konstituive, deputeti i Lidhjes Demokratike të Kosovës, Lutfi Haziri, konfirmoi se do të marrë pjesë në mbledhjen e sotme.

Ai shprehu shpresën se gjatë ditës do të gjendet një zgjidhje lidhur me Kuvendin dhe presidentin.

Haziri deklaroi se përfaqësuesit e LDK-së kanë ardhur për të qenë pjesë e seancës konstituive. Sipas tij, pavarësisht zhvillimeve të djeshme, qasja duhet të ndryshojë dhe të merren parasysh thirrjet për respektimin e Kushtetutës dhe konstituimin e Kuvendit. Ai tha se partia e parë e neglizhoi këtë proces dhe e mbylli seancën për ditën e djeshme.

Deputeti i LDK-së shtoi se sot pret që zhvillimet politike të çojnë drejt normalizimit të Kuvendit të Republikës, në mënyrë që të krijohen mundësi për zbatimin e rezultateve zgjedhore në rastin e Qeverisë dhe Presidentit.

Duke komentuar deklaratën e Haxhiut se nënshkrimet e mbrëmshme nuk janë procesuar, Haziri theksoi se kjo çështje nuk lidhet as me të dhe as me LDK-në.

Ai tha se nuk e kupton se për cilat nënshkrime bëhet fjalë dhe kërkoi që pyetjet t’u drejtohen atyre që kanë shkaktuar procese të tilla, duke përsëritur se kjo nuk ka të bëjë me LDK-në.

Kuvendi i Kosovës e ka caktuar vazhdimin e seancës konstituive për të shtunën, sot, duke nisur nga ora 11:00. Partitë ish-opozitare kishin kërkuar që mbledhja të zhvillohej dje pasdite, me arsyetimin se në mesnatë skadonte afati kushtetues prej 30 ditësh për konstituimin e institucionit ligjvënës.

Nga zgjedhjet e 7 qershorit, LVV-ja siguroi 53 deputetë, PDK-ja 22, LDK-ja 18 dhe Aleanca 7.