Haxhiu zhvillon takim me Gërvallën, në fokus reagimi i shpejtë dhe bashkëpunimi institucional

Ushtruesja e Detyrës së Presidentes së Republikës së Kosovës, Albulena Haxhiu, ka bërë të ditur se ka zhvilluar një takim me zëvendëskryeministren dhe ministren e Drejtësisë, Donika Gërvalla-Schwarz, e cila mban edhe rolin e koordinatores kombëtare për mbrojtje nga dhuna në familje dhe dhuna me bazë gjinore.

Sipas Haxhiut, gjatë këtij takimi është vënë në pah domosdoshmëria e një reagimi institucional më të shpejtë, si dhe e një bashkërendimi më të mirë mes të gjitha mekanizmave përgjegjës, në mënyrë që secili rast dhune të trajtohet me kujdesin dhe seriozitetin e kërkuar.

Në diskutim ka qenë edhe rëndësia e parandalimit të dhunës nëpërmjet edukimit, rritjes së vetëdijes publike dhe forcimit të koordinimit ndërinstitucional, ku përfshihen Policia, sistemi i drejtësisë dhe shërbimet sociale.

Postim i plotë:

Sot mirëprita në takim zëvendëskryeministren dhe ministren e Drejtësisë, Donika Gërvalla-Schwarz, njëkohësisht koordinatore kombëtare për mbrojtje nga dhuna në familje, dhuna ndaj grave dhe dhuna në baza gjinore. Theksuam nevojën për reagim të shpejtë institucional dhe koordinim më të mirë ndërmjet të gjitha hallkave përgjegjëse, në mënyrë që çdo rast dhune të trajtohet me seriozitetin dhe kujdesin e duhur.

Diskutuam gjithashtu domosdoshmërinë e parandalimit të dhunës përmes edukimit, rritjes së ndërgjegjësimit publik dhe forcimit të bashkëpunimit ndërinstitucional, përfshirë policinë, sistemin e drejtësisë dhe shërbimet sociale.

Lufta kundër dhunës me bazë gjinore kërkon angazhim të vazhdueshëm dhe zero tolerancë ndaj çdo forme të saj, si dhe krijimin e një mjedisi ku gratë dhe vajzat ndihen të sigurta e të mbrojtura në çdo hap të jetës.