Haxhiu: Tri familje mësojnë fatin e të afërmve të zhdukur që nga viti 1999

Kryetarja e Kuvendit të Kosovës, Albulena Haxhiu, njoftoi se tri familje morën sot lajmin për të afërmit e tyre të zhdukur me dhunë që prej vitit 1999. Identiteti i tri viktimave u konfirmua përmes analizave të ADN-së, pasi mbetjet e tyre mortore u zhvarrosën nga varrezat masive në Kalludër dhe Jabukë të Zubin Potokut.

Sipas Haxhiut, viktimat ishin shqiptarë nga Skenderaj dhe Mitrovica, pjesë e grupit të njohur si “Grupi i Intelektualëve”. Ata u rrëmbyen nga forcat serbe më 19 prill 1999.

Në postimin e saj, Haxhiu tha se familjet kaluan 27 vjet pa e ditur ku ndodheshin të dashurit e tyre. Tani pritja e tyre ka marrë fund, ndonëse dhimbja mbetet. Ajo u shprehu ngushëllime dhe tha se bashkëndjen edhe me familjet e tjera që presin rezultatet e gërmimeve në javët në vijim.

Haxhiu theksoi se kërkimi do të vazhdojë derisa të gjendet personi i fundit i zhdukur me dhunë dhe përgjegjësit të dalin para drejtësisë.