Haxhiu i kërkon KGJK-së të procedojë pa zvarritje dorëheqjet e gjyqtarëve serbë të dorëzuara më 2022

Ushtruesja e detyrës së Presidentes së Kosovës, Albulena Haxhiu, i është drejtuar kryesuesit të Këshillit Gjyqësor të Kosovës, Rrustem Thaçi, me kërkesën që të trajtohen pa vonesë dorëheqjet e gjyqtarëve nga komuniteti serb, të paraqitura gjatë vitit 2022.

Në letrën e siguruar nga Telegrafi, Haxhiu ngre shqetësim për faktin se këto raste nuk janë proceduar ende, duke rikujtuar se legjislacioni në fuqi përcakton që, pas dorëheqjes së një gjyqtari, KGJK-ja ia propozon Presidentit lirimin e tij nga funksioni.

“Përmes kësaj letre, më lejoni të shpreh shqetësimin tim për mosmiratimin e dorëheqjeve të gjyqtarëve të komunitetit serb, të paraqitura në vitin 2022”, thuhet në letrën e Haxhiut.

Sipas saj, shqyrtimi dhe marrja e vendimit për këto dorëheqje i takojnë KGJK-së, por deri më tani ky institucion nuk i ka ndërmarrë hapat e nevojshëm për t’i përmbyllur procedurat përkatëse.

Haxhiu vlerëson se zvarritja e këtyre pozitave në status pezull për një kohë kaq të gjatë po ndikon drejtpërdrejt në funksionimin e sistemit të drejtësisë.

“Mbajtja pezull e këtyre pozitave për një periudhë kaq të gjatë cenon sigurinë juridike, pengon funksionimin e plotë të sistemit të drejtësisë dhe ndikon në efikasitetin e institucioneve përgjegjëse”, theksohet në letër.

Në përmbyllje, Haxhiu i kërkon KGJK-së që, në përputhje me Kushtetutën dhe ligjet në fuqi, të ndërmarrë veprimet e domosdoshme ligjore për të garantuar funksionimin e rregullt, efektiv dhe gjithëpërfshirës të sistemit të drejtësisë në Kosovë.