Haradinaj kujton heroin Enver Zymeri: Flijimi i tij, bazament i shtetit të Kosovës

Kreu i Aleancës për Ardhmërinë e Kosovës, Ramush Haradinaj, ka sjellë në kujtesë rënien heroike të Enver Zymerit, ish-luftëtar i Ushtrisë Çlirimtare të Kosovës dhe pjesëtar i Policisë së Kosovës.

Në një mesazh të tij, Haradinaj ka theksuar peshën e kontributit dhe flijimit të Zymerit, duke nënvizuar se jeta e tij dhe e të gjithë atyre që u sakrifikuan për liri, dëshmojnë për mbrojtjen e pandërprerë të Republikës së Kosovës.

“Në këtë ditë nderojmë rënien heroike të Enver Zymerit, që shërbeu në Ushtrinë Çlirimtare të Kosovës dhe në Policinë e Kosovës”, shprehet Haradinaj në shkrimin e tij.

Mesazhi i plotë vijon me këto fjalë: “Jetesa dhe përkushtimi i Enverit, i Afrimit dhe i gjithë dëshmorëve të lirisë së atdheut, janë prova se siguria e Republikës së Kosovës mbështetet mbi sakrificën, trimërinë dhe besimin e patundur në shtetin tonë.”

“Uniforma e policit që mbajti Enveri, flijimi dhe modeli i tij, bashkë me të gjithë heronjtë tanë, në kohë lufte e paqeje, përbëjnë bazën mbi të cilën ngrihet shteti ynë. Mirënjohje e amshuar për shërbimin dhe heroizmin e tyre!” përfundon ai.