Glauk Konjufca shpallet sërish i pafajshëm për rastin e gazit lotsjellës në Kuvend

Gjykata Themelore në Prishtinë ka vendosur ta lirojë nga akuzat Glauk Konjufcën, në kuadër të rigjykimit për hedhjen e gazit lotsjellës në sallën e Kuvendit.

Vendimi është shpallur sot, më 28 gusht, pasi ka përfunduar shqyrtimi gjyqësor. Lajmi është raportuar nga “Betimi për Drejtësi” dhe është transmetuar nga Klankosova.tv.

Konjufca përballej me akuzën për “Përdorimi i armës apo mjetit të rrezikshëm”, për shkak të ngjarjes së 10 gushtit 2016, kur në sallën e Kuvendit ishte hedhur gaz lotsjellës.

Gjatë procesit të rigjykimit, Prokuroria kishte kërkuar shpalljen e tij fajtor dhe caktimin e një dënimi meritor, me pretendimin se veprimet e tij përbënin vepër penale.

Mbrojtja, ndërkaq, kishte kërkuar që gjykata të nxirrte aktgjykim lirues, pasi, sipas saj, nuk ishte dëshmuar përtej dyshimit të arsyeshëm se Konjufca e kishte kryer veprën për të cilën akuzohej.

Gjatë rigjykimit, Konjufca kishte deklaruar se ishte i pafajshëm dhe kishte zgjedhur të mbrohej në heshtje.

Bëhet fjalë për herën e dytë që Gjykata Themelore në Prishtinë e shpall Konjufcën të pafajshëm për këtë akuzë. Vendimi i parë lirues ishte dhënë më 26 shkurt 2024, por Gjykata e Apelit e kishte anuluar atë dhe e kishte kthyer çështjen në rigjykim.

Sa i përket akuzës tjetër, asaj për “Pengimi i personit zyrtar në kryerjen e detyrës zyrtare”, ndjekja penale ishte parashkruar.

Sipas akuzës, më 10 gusht 2016, gjatë një mbledhjeje në sallën e Kuvendit, Konjufca kishte hedhur gaz lotsjellës. Për pasojë, mbledhja ishte ndërprerë dhe personat e pranishëm ishin larguar nga salla.